”الخوف في الوقت الحالي شجاعة”.. شاهد سلاف فواخرجي عن كورونا (فيديو)

"الخوف في الوقت الحالي شجاعة" سلاف فواخرجي كان لها رأي مختلف حول الهلع الذي يسيطر على الشعوب في الوقت الحالي من فيروس كورونا المستجد، حيث رأت أن الخوف هو الحل الأمثل.

نشرت مقطع فيديو عبر حسابها الخاص بموقع تبادل الصور والفيديوهات "إنستجرام" وهي تعقم جنينة منزلها ووجهت رسالة تحذيرية وتوعوية لجمهورها كاتبة: "لازم نتعامل بجدية أكبر مع الكارثة البشرية الحالية اللي اسمها كورونا ، بعيدا عن نظريات المؤامرة وتحليلها وتفنيدها، الكارثة اللي عم نعيشها أمر واقع مافينا نغض بصر عنه ولانتكبر عليه وكل يوم قدام عيوننا عم ينصاب ويموت عشرات ومئات أحيانا بكل العالم".

وأضافت "مو عيب نخاف، وبالوقت الحالي شجاعة أنه نخاف، ومسؤولية أنه نخاف، ووعي وثقافة وعاطفة كمان ... طبعا أكيد مو لدرجة الهلع، كرمال نعرف نتصرف بعقلانية وبحكمة . وماحدا يقول انا مارح أثر ، كل شخص فينا بيأثر، وكل واحد فينا مسؤول لانقاذ حالنا وانقاذ عيلنا وغيرنا واللي منحبهم واللي مامنحبهم".

وتابعت: "كلنا سوا حاليا بمركب واحد، يابننجو يا بنغرق ... ويا بنقود السفينة بهدوء وببطء وبعقل وبتروي ولو طال الطريق شوي، يا بنقود بسرعة وبجنون وبرعونة ... والكل بروح ... ببساطة... العقل عقلنا والمسار نحنا اللي منحدده".

واستكملت: "بنفس الوقت ... الكارثة البشرية التانية هي الحالة الاقتصادية اللي تجمدت نتيجة تعليق كل شي بالحياة ، صحيح صحيا القعدة بالبيت لصالحنا بس معيشيا الوضع أصعب من كل الحكي .
ومن الشجاعة والاخلاق نساعد بعض ونحس ونكون لبعض ، مارح نعمل تحديات ومارح نتصور ونعلن ... الكل لازم يساعد بدون استثناء ... واجب الدولة أكيد ... بالمطلق".

واستطردت: "بس أنا عم أحكي عن واجبنا الاجتماعي نحنا اتجاه بعض، اللي معه كتير واللي معه شوي .لانو اذا مامتنا من الكورونا رح نموت من الجوع ومن الذل، طالما معظم الأمور الحياتية وقفت لأجل غير مسمّى...والموت بالمرض بهيك حالة اهون من الموت بذل ...لهيك يمكن متل ماعلمتنا الكورونا نكون أشخاص جيدين التصرف والسلوك والنضافة".

وأشارت سلاف فواخرجي: كمان كارثة الكورونا عطتنا فرصة نعيش انسانيتنا المفقودة، والوقت هلأ كتير مناسب لنرجع بشر، ونحمي حالنا وولادنا وغيرنا ... من المرض، من الجوع، من العازة والاحتياج ... قدمنا وعم نقدم ولازم نقدم اكتر بدون تحديات وبدون تحديد أرقام وأعداد، وكل شيء وأقل شيء منقدمه بيفرق عند كتير ناس".

أقرأ أيضًا: كورونا يهدد نجوم العالم.. وفاة فنان شهير بعد إصابته بالفيروس المستجد

واختتمت: "إذا اعتبرنا الوباء غضب من ربنا، فالإنسانية هو عطاء ربنا اللي لازم نمارسه حاليا وبقوة وبشجاعة ... ماحدا يقول انا مادخلني ... كلنا دخلنا ...والإيمان المطلوب هو ايماننا بحالنا لنطلع من هالازمة على خير بأقل خسائر ممكنة ... والله رح يكون معنا لأنه منكون عقلنا وتوكلنا .... العقل ثم التوكل".