دعاية مبتذلة.. هجوم حاد من كاملة أبو ذكرى على يوسف الشريف
أعربت المخرجة كاملة أبو ذكري عن استيائها الشديد من تصريحات يوسف الشريف التي أثارت الجدل خلال اليومين الماضيين حول رفضه ملامسة الممثلات والمشاهد الساخنة.
وهاجمت كاملة أبو ذكري يوسف الشريف من خلال تدوينة أعربت من خلالها عن رأيها عبر حسابها الخاص بموقع التواصل الاجتماعي "فيس بوك"، حيث كتبت: "لما يبقي في مشهد لحبيب بيحاول ينقذ حبيبته، والمخرج يقوله هتمسكها وتشدها علشان تبعدها عن طلقة الرصاص، يقوم النجم الفاضل يرفض إنه يمسكها، علشان هو ما بيلمسش الستات.. هي دي بقي المشاهد الساخنة اللي حضرتك بتتكلم عنها؟؟".
وأضافت: "ولما النجم يدعو الناس للصلاة وترك مشاهدة مسلسله أثناء موسم عرضه.. ده اسمه دين جديد ولا إيه؟؟ بالنسبه ليا ده اسمه نوع من أنواع الدعاية المبتذلة واستغلال أطهر شيء في الوجود لأغراض النجومية وزيادة عدد المشاهدات.. عايز ترضي ربنا في شغلك اختار مواضيع تنور عقل المشاهد أو تشرح قلبه".
وتابعت كاملة: "تبقى عايز ترضي ضميرك وتقول في شغلك كلمة حق يمكن تبقي سبب إن ناسك يعيشوا أحسن.. والمجاهرة بالصلاة واستغلالها ده محرم في دينك".
تصريحات يوسف الشريف ورفض المشاهد الساخنة
يُذكر أن رامي رضوان استضاف يوسف الشريف مؤخرًا في برنامج "مساء dmc"، وكشف يوسف الشريف خلال الحوار عن سبب رفضه ملامسة الممثلات على خلفية عدم تصوير أحد المشاهد في مسلسل "النهاية"، وبعد تصريحه بشأن رفضه المشاهد الساخنة، أثيرت ضجة كبيرة على مواقع التواصل الاجتماعي، وبالرغم من مهاجمة البعض له، إلا أن الأغلب حرص على دعمه.
اقرأ أيضًا: موعد عرض مسلسل ”ابن حلال” على ”MBC مصر”
وقال يوسف الشريف خلال لقائه: "في قيود أنا بحطها لنفسي زيادة عن أي حد تاني، دي حقيقة بقالها 10 سنين أو أكتر، ده من بعد فيلم هي فوضى، بدأت أفكر بالطريقة دي.. دي حرية شخصية طالما مبضرش حد.. أنا مبستريحش لو بقي فيه مشاهد ساخنة أو فيها قبلات.. دي قاعدة بطبقها على نفسي بس.. بدأت أحط قيود لأن قبل كده في منتجين اتفقت معاهم على ده ووقت التنفيذ غيروا كلامهم".
وأضاف: "وهنا أنا لا أزايد على زملائي أو إني أحسن منهم، بالعكس كلهم ليهم الاحترام ومنهم من يقدمون أعمالا محترمة دون أن يتعمدوا هذه الطريقة.. عشان بس الكلام ميتفهمش إني بزايد عليهم أو بقول إني أحسن منهم.. خالص".
