”شرب في البسين وكسر إزاز على الناس”.. سيدة تروي تجربتها مع طفل المرور
مع انتشار فيديوهات طفل المرور والقبض عليه مرة أخرى، بعد ساعات من تسليمه لأسرته التي تعهدت بإخضاعه لجلسات تعديل سلوك وعلاج نفسي، وخروجه في "لايف" عبر موقع الصور والفيديوهات "إنستجرام" يسب متابعيه ويهددهم قائلًا: "إحنا بنسجن مبنتسجنش"، بدأ البعض في التعرف عليه وسرد مواقف قديمة له معهم.
وبمجرد انتشار قصة الطفل الملقب بـ"حريقة"، استرجعت سيدة تدعى سالي محمد موقفًا له مع أصدقائه، حيث كتبت عبر صفحتها على موقع التواصل الاجتماعي "فيس بوك": "من أول ما شوفت الفيديو بتاع الولد وأمين الشرطة وأنا حاسة إن شكل و تصرفات الولد مش غريبة عليا، لحد ما اكتشفت من البوستات إن اسمه "حريقة"، وما أدراك ما اليومين الزفت اللي عيشتهم فى إحدى القرى في العين السخنة بسبب هذا الحريقة وأصدقائه".
تابعت السيدة حكايتها مع "حريقة": "مبدأيا أول ما شوفته كان نازل البيسين ومعاه صحابه وبيشرب جوة البيسين ويرمي كانز وأزايز القرف اللي بيشربه على الأرض برة، والمكان اللي لسه مخلصتش دلقها على كل الشيزلونجات والكراسي اللي على البيسين".
سالي: الأمن كتفه عشان أبوه ياخده
لم يتوقف "حريقة" عند ذلك الحد، حيث تواصل السيدة قائلة: "الباشا طلع يتنشف راح صاحبه مطلعله علب ألوان صغيرة دلقها كلها في البيسين بقى لونه أصفر، جالهم الأمن وسمعت منه أقذر شتايم ممكن تتخيلوها في الوجود".
وعلى الرغم من أن أصدقائه أجبروه على الصعود للشاليه، إلا أنه انتقم بإلقاء زجاجات من الدور الثالث، حسب "سالي": "أزايز تتكسر تحت رجل الناس وتحديدًا البنات اللي بتتمشى في أمان الله بعد ما اتحرموا من نزول البيسين بسبب القرف اللي عمله فيه، ورمى بلتكانة ستارة وملل سرير"، بالإضافة إلى استمراره في توجيه الشتائم والسباب الخارج من البلكونة طوال الليل.
اقرأ أيضًا: في واقعة طفل المرور.. هل يحق لرجلي الشرطة مقاضاة ”ابن القاضي”؟
واستكملت السيدة: "الفجر سمعنا صوت ودوشة وشتايم اكتشفنا إن الأمن طلع كتفه عشان باباه جه ياخده بعد ما كل الناس اللي حوالينا اشتكوا والأمن كلم باباه أكتر من مرة من الصبح بس الباشا وصل تاني يوم الفجر، والغريب إنه استمر يشتم نفس الشتايم القذرة دي فى وجود باباه".
واختتمت السيدة رواية تجربتها مع "حريقة" قائلة: "مش عارفة أدعي وأقول ربنا يعين أهله ولا ربنا ينتقم منهم على المسخ اللي جايبينه ده".
