عقلية صبيانية.. هجوم حاد من جماهير الزمالك على أوباما بسبب كهربا

تعرض يوسف أوباما لاعب الفريق الأول لكرة القدم بنادي الزمالك، لهجوم حاد من جماهير القلعة البيضاء، بسبب محمود كهربا لاعب الأهلي.

وجاء ذلك بعد إعجاب صانع ألعاب الزمالك بمنشور لكهربا خلال احتفاله بالتتويج بدوري أبطال إفريقيا على حساب الزمالك.

وكتبت إحدى الصفحات الجماهيرية على موقع التواصل الاجتماعي "فيسبوك": "مشكلتك يا أوباما إنك مش قادر تصدق إنك بقيت لاعب كبير من كباتن الفريق".

وتابع: "مشكلتك إنك لسه حاطت نفسك في دايرة اللاعب الناشىء الصغير اللي أفعاله مينفعش يتحاسب عليها زي أي لاعب كبير قائد عليه مسؤولية وواجبات، انت دلوقتي في مرحلة القدوة للشباب، فاهم يعني ايه، حاول تبقى قدها وفوق من مرحلة الطفولة دي عدت خلاص وقتها، فوق عشان منخسركش ومتخسرناش فوق عشان الزمالك أكبر".

وكتب أحد الجماهير: "للأسف عقليه صبيانية، غلط لما عمل لايك بدل ما يطلع يعتذر ويعد الجمهور بأنه سيقاتل في اللي جاي طالع يحاول خداع الناس والتنصل من الخطأ".

وأضاف آخر: "أنا أكتر واحد شجعت أوباما وقلت عليه إنه أهم لاعب في الماتش، لكن بعد خطوبته قبل الماتش عرفت إنه لا يصلح لنادي الزمالك لأنه مريض نفسيًا، وده معروف لكن اللي مش مفهوم إزاي أمير مرتضي يسمح بده".

وتابع: "احنا مش فريق كورة إحنا في تكية أهاليهم، وهقول شئ أخير لو أوباما كمل في الزمالك الفريق هيفقد جماهير كتير وأنا أولهم لأنه لاعب عديم الإحساس والسبب الأساسي في ضياع بطولة غالية علينا وجمهور الزمالك مش بينسى".

أوباما يرد على الجماهير

رد صانع ألعاب الزمالك على هجوم الجماهير، حيث كتب عبر استوري موقع تبادل الصور "إنستجرام": "استغفر الله العظيم، لايك إيه اللي اعمله يا جماعة، انتوا إزاي كده، الحمد لله رجعت الإيميل على طول حسبي الله ونعم الوكيل في كل واحد بيحاول يخلي صورتي وحشة".