زوجة لمحكمة الأسرة: جوزي عايزني أمشي في الحرام

من داخل قاعة محكمة الأسرة بمدينة نصر، تقف "نسرين" بجوار الباب على دكة خشبية، ترتدي عباءة سوداء اللون، ويبدو على وجهها علامات الحزن من المستقبل وتنظر بين الحين والآخر إلى سقف القاعة، وبجوارها طفلتها في عامها الأول.

وتحكي الزوجة سبب حضورها لإقامة دعوى خلع ضد زوجها، وقالت: "تزوجت من "م. أ" ويعمل حدادا، وظهر على حقيقته، بعدما طلب مني أمشي في الحرام وهو يصطاد الزبائن ويستأجر شقة أخرى، بإحدى الأماكن العشوائية والساعة بـ250 جنيه.

وتلتقط "نسرين " أنفاسها وتضيف: "قالي إنه هو المسؤول عن دخول الزباين للبيت، ولو حد سألني عن علاقتى بيه أقول صديقي مش جوزي، عشان كان عايز يكسب فلوس ويسهر مع صحابه يشرب مخدرات".

وقالت "نسرين" عن تفاصيل خطوبتها التي استمرت سنة، بعدما رأته للمرة الأولى في خطوبة صديقتها.

ثم تقدم لوالدها وطلب يدها، مؤكدة أنه خدعها بكلامه المعسول، معبرة عن ندمها على قصر فترة الخطوبة التي لم تمكنها من التعرف عليه جيدًا، وتابعت : "كان عمري 21 سنة وهو 28 سنة، كان بيشتغل 17 ساعة يوميا عشان يلحق يوفر تكاليف الزواج والفرح".

وزادت "بعد الجواز رفض نزولي الشغل في مصنع كنت بشتغل فيه، واستأجرنا شقة، وبعد فترة من الزواج بدأ ما ينتظمش في الشغل زي الأول، وأسلوبه اتغير في الكلام وبقى يتعصب بسرعة ويشتمني بألفاظ خارجة، ويضربني مع اني كنت حامل في بنتنا، ومبقاش يصرف عليا حتى مصاريف الولادة دفعها بابا لأنه مكنش بيشتغل كويس".

وقالت "كان يرجع البيت متأخر وكانت رائحته فائحة من الشرب والدخان"، وكان يعاشرني بالقوة، لدرجة إنى كنت بصرخ عشان يبعد عني، وبدأ يتهرب من مصاريف البيت، وأنا بدأت أستلف من أمي علشان اجيب ملابس ومصاريف بنتي".

وعن طلب زوجها منها معاشرة رجال آخرين قالت "في يوم رجع من سهرة مع أصحابه، وطلبني للفراش، وعرض علي الفكرة الشيطانية انه أمشي في الحرام واخد برشام منع الحمل وقالي دا شغل يكسب فلوس كتير ونستأجر شقة بعيد عن هنا ونخلي الساعة بـ250 جنيه.. الكلام دا بعد سنة ونص من جوازنا".

وأضافت: أنا اتصدمت من كلامه، وعرضت الموضوع على أسرتي وحصلت مشاكل كبيرة بينه وبين أبويا، وجوزي رفض يطلقني، وملاقيتش إلا محكمة الأسرة عشان أرفع دعوى خلع وأرتاح منه.