الداعية مصطفى حسني يشيد بتامر حسني.. والأخير يرد: ”أنا هبروز رأيك”
أشاد الداعية مصطفى حسني، بأغنية النجم تامر حسني "مش تمثال"، وذلك من خلال تعليق كتبه على منشور تامر الذي كان يحمس من خلاله الشباب.
وعلق مصطفى حسني قائلة" قد أيه مشوار حياة الانسان بيحتاج لتشجيع و دعم يملأ قلبه بالإصرار والأمل في ربنا و الثقة في حسن تدبيره لعباده".
أضاف مصطفى حسني: "تسلم يا تامر يا صاحبي على كل كلمة طلعت من قلبك ملأت قلوب الشباب بالطموح و القوة اللي تخليهم يقاوموا أي إحباط".
أردف: "وصدق ربي هو بيطمن عباده أنه دايما قريب ومعاهم (وأصبر لحكم ربك فأنك بأعيننا) وصدق رسوله صلى الله عليه و سلم وهو بيشجع ويطبطب على كتف كل مجتهد ويقول له (استعن بالله ولا تعجز)، وصدق كل عبده قلبه طيب كلامه مُلهم بيشجع و يملأ القلب بالنور والامل، وصدقت يا صاحبي الغالي وانت بتغني من قلبك (واتعلم انك لما تقع لازم تقوم)".
ورد تامر حسني على تعليق الداعية قائلا: "أخي وصديقي الغالي مصطفى حسني أولاً أنا هبروز رأيك وأخليه في غرفتي لسبب مهم أوي أوي، لإني معجب بالسماحه والحنيه اللي في قلبك اللي تخليك تدخل تكتبلي تعليق زي دا يشجعني انا شخصياً على الإستمرار و يشجع ملايين زيي على المثابره لإن التعليق جاي من رمز مهم زيك رمز كلنا بنحبه وأنا شخصياً بدعيلك في ظهرك دايماً و أمامك وانت عارف ودايماً بتسمع مني الدعوه دي في مكالماتنا".
اقرأ أيضًا: ”إحساس جميل”.. أول تعليق من أحمد سعد بعد عقد قرانه على علياء بسيوني
واستكمل: "ربنا ينصرنا بيك يا أملنا ، اللي زيك يا مصطفى لازم نديله عينينا عشان يكمل، شباب الأمه كلها محتاج قلوب زيك قلوب تعرف تخاطب الكل بمنتهى الود والحب والرحمه قلوب متفصلش نفسها عن المجتمع قلوب قويه جريئه مبتخافش وانت كدا، عشان كدا كل الناس بمختلف فئاتها بتحبك، شكراً لردك شبابنا يستاهل ان كلنا نتحد و نهتم بيه ونرشدهم بخبرة كل حد فينا على طريق النجاح في العصر الصعب دا، ازاي ينجحوا ويحققوا احلامهم في ظل كل طاقات الإحباط الموجوده ازاي يعرفوا يكونوا إيجابيين و يعرفوا منين يطلعوا الطاقه اللي تخلي عندهم رغبه في النجاح ، شكراً يا مصطفى شكراً يا صديقي شكراً يابن حسني، اخوك تامرحسني".
