بعد وصفها بالجحود.. ابنة الفنان عمرو محمد ترد على تصريحاته
انتشرت حالة تعاطف كبيرة على السوشيال ميديا مع الفنان عمرو محمد علي بعد ظهوره في بعض الصحف يتحدث عن مأساته ومرضه الشديد وأنه محتاج يتعالج عشان يرجع للشاشات مرة أخري، واستجابة نقابة الممثلين له.
ورداً على تصريحات الفنان عمرو محمد قامت ابنته شهد بالظهور لأول مرة من خلال لايف عبر حسابها الشخصي لتوجه رسالة لوالدها قائلة" بقي لي كتير ساكتة وقلت لمامتي ما نتكلمش مش عشان حاجة، ولكن علشان حياتنا الخاصة ما حدش يعرف عنها حاجة، ولكن بصراحة زاد أوي".
وأضافت شهد قائلة: أنا اسمي شهد عمرو محمد علي أغلب الناس ما تعرفش مين شهد لأنه بالنسبة لي اسم في البطاقة فقط، ومش هتكلم إنه قال عني جاحدة لأنه في الأول والآخر بابايا وبتمنى له الشفا، وماحدش يحكم على حد وهو ما يعرف القصة كاملة، ماحدش عارف مامتي عملت إيه وإيه حصل بينهم أدى لانفصالهم وأنهم ميكملوش.
واستكملت قائلة: محدش يعرف مامتي عملت إيه عشاني بقالها 20 سنة بتصرف عليا في لبسي ومن أول الحضانة لحد تانية جامعة وعملت عشاني كتير أوي وما أستحملش أسمع عنها نص كلمة ومحدش عارف أصل الحكاية، حرام أكون طول ما أنا ماشية اشوف في الصفحات الست اللي سابت جوزها.. ليه الناس بتحكم على حد من طرف واحد، وعلشان ما أطولش عليكم الست دي بطلة عملت كل حاجة في الحياة عشاني عشان ابقى إنسانة متعلمة.. وكفاية تحكموا على حد وأنتم متعرفوش القصة أساسها ايه.
واختتمت شهد اللايف بتمني الشفاء لوالدها قائلة: بوجه رسالة لوالدي بدعي له بالشفا ده أبويا مهما كان أما أهلي أنا آسفة مش مسامحة في كل كلمة باطل اتقالت في حق مامتي لأنها ست بمليون راجل.
