رجل يطلق زوجته غيابيا: ”مفترية وبتصرف 300 جنيه في اليوم”

طلاق غيابي أقدم عليه "محمود. ع"35 سنة، بعد أن نفد صبره من زوجته العشرينية "منى. م" 27 سنة، التي تنفق على الفاضى والمليان؛ ليلجأ في نهاية المطاف إلى تطليقها غيابيًا.

 

يروي"محمود": "تعبت من المصاريف اللى مش بتخلص بسبب او غير سبب وهي مش بتحس بي أنانية جدا ولازم كل يوم تطبخ لحوم  وإلا أبقى مابأكلهاش.. بشتغل شيفتين وأوقات تلاتة كمان علشان أسد مصاريفها وهي في اليوم الواحد عايزة أكتر من 300 جنيه".

 

وأضاف: "كنت بديها 3 آلاف جنيه وأنا بدفع كمان الإيجار والميه وكل حاجة.. آجي ألاقي مفيش فلوس معاها بدل ما توفر وتصرف على الفاضي.. بتشتري لبس ومكياج بجنون وأقولها تقولي أصل دي ماركة مش عارف إيه.. طب أنا مالي فلوسي أولى بيها بيتي وبنتي أحوش لمستقبلها مش أقعد أجيب لبس ومكياج فاضي".

 

اتهام بالبخل ضاق منه الزوج، يوضح: "لما قولتلها امسكي إيدك شوية علشان جايبة حاجات بـ900 جنيه تقولي المصاريف غليت قولتلها مهو الدولاب على أخره أهو وهدومك في دولاب الأطفال كمان هتعملي إيه باللبس ده كله وانتي أصلا مبتخرجيش اللي عايز يكنز لبس يجيبه من جيبه من مصروف البيت وبطلت اديها المصروف.. اتهمتني بالبخل وإني مجوعها وغضبت عند أبوها ولما قعدت مع أبوها علشان أصالحها يرد يقولي بنتي تعيش أحسن عيشة قولتله خلاص اصرف عليها انت.. هو انا غلطان علشان عايز أحوش وأشيل فلوس للزمن.. طلقتها لأنها هددتني بالخلع وأنا راجل حر مقعدش واحدة مش عايزاني على ذمتي".