«عنيكي».. قصيدة جديدة للشاعر يوسف المهدي
ننشر قصيدة جديدة للشاعر يوسف المهدي، بعنوان «عنيكي».
قصيدة عنيكي
قدامي سِكة سفر
وانتي الطريق والمَتاع
دونِك ضَعيف خايف ..
بيكي مُحارب شجاع !
من يوم ما قابلتك وانا فيَّا
أشياء مش عارف اخبيها.
حُبي الواضح
غيرتي عَليكي
عينِي اللي بتضحك لعنيكي.
كل الخَساير قابله للتعويض.
إلا اني اسيبِك تبقي عني بعيد
بَحكي معاها بكل ود مباح
قولتلها هطلب طلب قالت «عيوني»
معرفش ايه لزمتها حمل سلاح !
مين زيها ينصرني.
اتبسمت تإثرني
لو دمعت تقتلني
لو صبَّحت ترضيني.
غاوية الجرايم بالعيون بالذات
علشان مفيش للقتل ده بصمات!
دايما جميلة وطيبة وصادقة ومسامحه.
في عنيها هُدنِة وقف إطلاق الدموع
والإحتياطي النقدي م الفرحة
وإجابة الفضفضة للمولى والدعوات..
هي النعيم والسند والـ ٢٤ قيراط
هي الوصول بعد الشتات والتيه ..
قلبي اللي ممنوع ع الجميع
في كفها برميه..
السيل هاجمني ويوم لقاها يوم ركِبت الفُلك.
عينها الرجوع والقافلة والملك
أمان لتايه قضى ليلُه يخاف..
ضحكتها عُمر نعيم
دمعتها سبع عجاف..
مفيش أمل في الحزن مرة كمان..
ومفيش بداية أحلي من دي تسعد الإنسان.
يمكن يتم مرادنا بُكرة او سَنة أو حتى اياً كان..
حلوة الرواية م البداية وملهِمه.
ومفيش نهاية إلا بالفستان.
جدير بالذكر أن يوسف المهدي درس في جامعة الأزهر بالزقازيق وهو ممن مواليد 92 بمحافظة الشرقية مركز منيا القمح، وله انتشار واسع بين القراء بمصر بمختلف أعمارهم، ويقيم حفلات عديدة ناجحة في المحافظات تشهد تواجدا جماهيريا كبيرا.
ومن مؤلفاته الشعرية: الأول عام 2018 تحت عنوان «قميص يوسف»، والثاني عام 2020 بعنوان «أي لمعة حزن»، والكتاب الثالث «المشاعر»، وقصيدة أخرى بعنوان «عنيكي».
اقرأ أيضا.. قصور الثقافة تطلق ورشة «ابدأ حلمك السينمائية» بالإسكندرية
