أحمد موسى: الدولة لا تتستر على أي فساد ومحدش يقدر يطبطب على حد النهاردة
قال الإعلامي أحمد موسى، إن جماعة الإخوان الإرهابية كانت تنفذ مخططًا صهيونيًا في مصر في الفترة من 2011 حتى 2013 قائلا : «البلد دي كانت رايحة في حتة صعبة أوي».
وأضاف أحمد موسى خلال تقديمه برنامج على مسئوليتي المذاع على قناة صدى البلد، أن هناك دولًا تتخذ إجراءات صعبة جدًا للحفاظ على أمنها القومي، معلقًا: مفيش حد في البلاد الخارجية يجرؤ بالحديث الخادش عن البلد المقيم فيها ولو بكلمة واحدة.
وتابع: «إحنا بلد كبيرة أوي وتاريخ كبير جدًا وحضارة عريقة، لكن التاريخ مش كل حاجة ولازم نبص على المستقبل، متعجبًا: هو الرئيس السيسي غلط عشان بيعمل للناس مستقبل أحسن؟!.
وأوضح أحمد موسى، أن الدولة لا تتستر على أي فساد في مؤسساتها والجميع أمام القانون قائلا: «محدش يقدر يطبطب على حد النهاردة في قضايا فساد وغيره، مفيش هنا طبطبة ومفيش تهاون».
وأردف الإعلامي أحمد موسى: «كان فيه قطارات سكة حديد متهالكة وكان كل يوم عندنا كارثة في حوادث القطارات، وقطار الصعيد كان بيشهد كوارث كبيرة سواء من التنظيمات الإرهابية اللي كانت موجودة في السكة الحديد، أو التهاون عن إجراء التحويلات بين الخطوط وبعضها».
وأكد أحمد موسى، أن الحكومة المصرية الحالية نجحت في تحويل الصحراء إلى تنمية زراعية وصناعية كبيرة تضاهي الدول الأوروبية الكبرى، معقبًا: «مكنش عندنا حاجة قبل سنة 2014 من المشروعات الحالية ومحتاجين تاني من النوعيات دي».
واختتم: «البلد النهاردة لما بتتحرك؛ بتاخذ إجراء مع المخربين لمواجهة الأزمات في الدولة، ودلوقتي إحنا البلد الأكثر استقرارا في المنطقة العربية رغم كل الأحداث التي تحدث بدول الجوار، وإن شاء الله بفضل ربنا البلد دي لن تعود إلى الوراء، ومش هيكون فيه عودة للإخوان تاني أبدًا».
