”التكبر مش حِلو”.. انكسار الدولار مع انخفاض سعر الفائدة والذهب يلمَع في السماء
في الجولة اللي شُفناها امبارح، واللي كانت حاسمة في تحديد سعر الفايدة اللي ملايين المواطنين في الدولة مستنيينها، قرر "حكم المباراة" البنك المركزي المصري خفض أسعار الفايدة بنسبة 1%، علشان يوصل عائد الإيداع لـ 21% والإقراض لـ 22%. وده بييجي في وقت بتعيش فيه العملة الأجنبية خسارة كبيرة.
الدولار ماكانش عنده رفاهية التكبر الفترة اللي فاتت، خصوصًا بعد قرارات اقتصادية إيجابية في مصر، خلتّه يواجه تحدّي كبير ما بين التراجع أو الهروب لباب استثماري تاني، وأشهر باب كان طبعًا "المعدن الأصفر" أو زي ما بيحب رجال الاقتصاد يلقّبوه "الذئب الخفي"، اللي فعلاً شاف ارتفاع كبير جدًا اليومين دول، وكسر حاجز 5200 جنيه لعيار 21، وسجّل الذهب عالميًا 3877 دولار للأونصة بزيادة حوالي 0.29%.
أسباب خفض البنك المركزي للفائدة
أهم سبب وراء القرار ده هو نمو الناتج المحلي الإجمالي، اللي وصل لـ 5% في الربع التاني من 2025، مقارنة بـ 4.8% في الربع اللي قبله، ومتوسط النمو في السنة المالية 2024/2025 سجّل 4.4%، مقابل 2.4% في 2023/2024. النمو ده مدفوع بمساهمات إيجابية من قطاعات زي:
- الصناعات التحويلية غير البترولية
- السياحة
- التجارة
ومع تسارع وتيرة النمو، الناتج لسه أقل من طاقته القصوى، وده معناه إن التضخم ممكن يستمر في الانخفاض على المدى القصير، لأن الطلب لسه مش بيشكّل ضغط كبير على الأسعار في ظل السياسة النقدية اللي ماشية.
أما السبب التاني، فيرجع لانخفاض معدل التضخم السنوي العام لـ 12.0% في أغسطس 2025، مقارنة بـ 13.9% في يوليو. وكمان، التضخم الأساسي نزل لـ 10.7% من 11.6% في نفس الفترة.
أسعار العملات اليوم
- اليورو: 56.04 جنيه للشراء – 56.21 جنيه للبيع
- الجنيه الإسترليني: 64.29 جنيه للشراء – 64.49 جنيه للبيع
- الريال السعودي: 12.71 جنيه للشراء – 12.75 جنيه للبيع
- الدينار الكويتي: 156.00 جنيه للشراء – 156.49 جنيه للبيع
- الدرهم الإماراتي: 12.98 جنيه للشراء – 13.02 جنيه للبيع
أسعار الذهب لحظة كتابة التقرير
- عيار 24: 5920 جنيه
- عيار 21: 5180 جنيه
- عيار 18: 4440 جنيه
- الجنيه الذهب: 41440 جنيه
