حقيقة تدخل مصطفى شعبان في سيناريو مسلسل ”درش”

تحدث المخرج أحمد خالد أمين عن كواليس مسلسل درش، الذي ينافس به ضمن موسم دراما رمضان 2026، وتعاونه مع الفنان مصطفى شعبان.

قال أحمد خالد أمين في مداخلة هاتفية مع الإعلامية نهال طايل ببرنامج إحنا لبعض، المذاع على قناة صدى البلد: «مصطفى شعبان ارتبط الجمهور معه في رمضان إنه جزء أساسي من المائدة الرمضانية، يعني هو طبق الرقاق الأساسي على السفرة.. لأن مصطفى لو نحسبها دلوقتي بقاله 17 سنة متتالي رمضان مخرجش ولا سنة من رمضان.. فيعتبر النجم الأطول عمراً في تاريخ الدراما، فهو جمهوره عريض وأنا محظوظ لأن المسلسل بيتشاف من أول حلقة بمشاهدة عالية من الأول بغض النظر عن إننا عاملين شغل حلو، لكن شعبيته بتخلي العمل يتشاف».

وتابع: «مسئولية كبيرة إن إحنا عارفين إن هو له شعبية وجماهيرية كبيرة وعارفين إن المسلسل هيتشاف كويس جدًا، فهيبقى صعب إن إحنا نفوت حاجة أو نبقى مش مهتمين بزيادة، فبنحترم عقلية الجمهور وإحنا شغالين مع مصطفى أو مع أي نجم آخر».

واستكمل مخرج مسلسل درش: «المسلسل اللي بياخد "هوك" من أول كام يوم ده اللي الجمهور بيبتدي يستنى أحداثه، يعني فكرة القفلات أو فكرة الموضوع نفسه قفل إزاي أو خلاني استنيت حلقة بكرة، فهو ده اللي بيعمل الإثارة عند الجمهور، وبالتالي إحنا الحمدلله الناس كلها بتطاردنا عايزين يعرفوا هو مين».

وفيما يخص مشهد إمامة مصطفى للمصلين، علق قائلًا: «المشهد ده أبسط حاجة إنه من بداية الحلقات راجل عايش طول عمره في الحسين وفي الأزهر، فمجرد ما رجع المنطقة كان أول شيء طبيعي لما أذن الآذان نخش الجامع، وكنت عايز أوجه رسالة للشباب إن لما يبقى عندهم نجم بحجم مصطفى شعبان يشوفوه حافظ للقرآن وقارئ جيد للقرآن وبيقول بتلاوة وبيقول بتجويد، فأنا بدي رسالة للشباب من أول سن 14 سنة لغاية سن 30 سنة اللي هم فاهمين إن النجومية شقاوة وشبحنة، لا فيه جزء تاني عند نجم مهم.. وده كان مهم عشان نشكك الناس في الومضة اللي هتجيله بتاعة إن هو على إيده صليب أو إن هو بيفتكر نفسه إنه مسيحي، عشان نعمل حالة من الجدل أكبر».

وعلق على جدل تصريحات الفنان حلمي فودة، ورد مؤلف العمل عليه، قائلًا: «في الأحداث بيلجأ لأكثر من دكتور نفسي، لكن كل الممثلين بلا استثناء محدش يعرف المسلسل نهايته إيه، إحنا كنا شايلين الحلقات اللي فيها الحدث نفسه مابتطلعش تقريبًا لحد خالص».

وأكد أحمد خالد أمين أنه تفاجأ بالفنان نضال الشافعي والفنان محمد علي رزق، نافيًا تدخل الفنان مصطفى شعبان في السيناريو والإخراج، مضيفًا: «أنا من أوائل المخرجين من أول ما بدأت 2016 مش ديكتاتور بس بحترم مهنتي بحترم كلمة المخرج، وأنا من مدرسة أستاذ شريف عرفة وعمرو عرفة يعني، فبالنسبة لي لو أنت مش داخل أصلاً كمخرج عارف تحط الكاميرا فين وعارف هتوجه الممثل إزاي وعارف إيه اللي هيتاخد في المونتاج يبقى أنت متخرجش أصلاً، لأن لو النجم خياله أعلى من خيالك طبيعي هو اللي هيسوق أو هو اللي هيوجه».

واختتم: «مصطفى شعبان نجم مهني بالدرجة الأولى يعني فاهم كويس قوي دور المخرج ودور المؤلف وبيدي مساحة لكل زمايله الممثلين في الأدوار وفي الأحجام، معندوش فكرة النجم اللي عايز يبقى بيظهر وغيره ما بيظهرش ومهتم جدًا بكل شخص جاي المسلسل وبيبقى مهتم إن محدش يبقى عنده مشكلة وفي ظهر المخرج طول الوقت، يعني اللحظة الوحيدة اللي ممكن مصطفى يختلف فيها لو حس إن المخرج أو الفريق مش مهتم أو إن هم بيتعاملوا إن هم جايين يصوروا مشهد ويمشوا وده محصلش معانا».