هترخص لـ15 جنيها.. مفاجأة حول سبب ارتفاع سعر الطماطم
كشف حسين أبو صدام نقيب الفلاحين سبب ارتفاع سعر الطماطم في الأسواق، معلقا: «مصر خامس أكبر دولة إنتاجاً للطماطم، يعني بننتج أكتر من 6.5 مليون طن، وينزرع نحو 500 ألف فدان طوال السنة، فمعندناش مشكلة في الطماطم بتاتاً، المشكلة في التوقيتات بتاعة اللي هي بترتفع فيها الأسعار.
وتابع خلال مداخلة هاتفية مع الإعلامية داليا وفقي ببرنامج شكل تاني على قناة صدى البلد 2: «الطماطم النهارده بتطلع من الغيط بـ 15 و20 جنيه فعلاً، لكن عندنا الحلقات الوسيطة من تاجر لتاجر لتاجر، وارتفاع تكلفة النقل وارتفاع الفاقد بيؤدي للأسعار اللي إحنا شايفينها اللي بتصل يمكن لـ 40 جنيه دلوقتي في بعض الأماكن، وممكن تزيد عن كدة في أماكن أخرى».
وواصل حسين أبو صدام: «هناك نوع من استغلال لبعض التجار مع اختلاف في الجودة، ومكان البيع، والمساحة اللي بيتم زراعتها في الوقت ده بتبقى قليلة، علاوة على إصابة الطماطم بعدة إصابات وندوات مختلفة بسبب ارتفاع درجات الحرارة وبالتالي إحنا عندنا انخفاض في الإنتاجية في الوقت ده، وخلال 25 يوم مش هتزيد عن كدة هنلاقي الطماطم رجعت لطبيعتها والأسعار بقت للمستهلك منخفضة جداً.»
واختتم حسين أبو صدام: «الطماطم هتبقى بـ 15 و20 جنيها للمستهلك، لأن العروة الصيفية تعد من أكبر العروات اللي بيتم زراعتها، والذروة بتاعتها بتبقى بعد 20 يوم، لكن الزراعات المبكرة منها معظمها طبعاً أُصيبت من درجات الحرارة دي المرتفعة والتقلبات الجوية فكان الإنتاج بتاعها قليل».
