لما جبريل عن المراهنات في كأس العالم 2026: ”نوع من أنواع القمار ومش متوقفة على المبارايات فقط

علقت الإعلامية لما جبريل على غرائب وطرائف كأس العالم 2026، وخاصة إعلانات شركات المراهنات المنتشرة في كل مكان، والتي تعد نوع من أنواع القمار.

 وقالت لما جبريل خلال فقرتها ببرنامج “الحكاية” مع الإعلامي عمرو أديب على قناة إم بي سي مصر:" هل ممكن شخص يخسر 9 ملايين دولار بسبب ماتش مصر وبلجيكا؟ لا صوت يعلو فوق صوت كأس العالم. أكشن كتير جدًا بيحصل في النسخة الحالية، والعالم كله بيتابع وبيتفرج وبيستمتع بالمباريات والنجوم المشاركين فيها. كمان فيه قوانين جديدة أضافت متعة مختلفة للبطولة".

وتابعت لما جبريل:  “لكن واضح إن فيه ناس مش مكتفية بالإثارة الكروية، فاتجهت للمراهنات. الموضوع بقى سهل جدًا: إعلانات شركات المراهنات في كل مكان، ومواقع وتطبيقات تقدر تنزلها وتحط فلوسك، ولو توقعت صح تكسب.. ولزيادة الإغراء، بيستعينوا بمؤثرين ومشاهير على مواقع التواصل الاجتماعي علشان يقنعوك إن الموضوع عادي وسهل وممكن يجيب فلوس إضافية. لكن في النهاية دي مراهنات، والمراهنات نوع من القمار".

وأضافت لما جبريل: “الغريب إن فيه مواقع أجنبية بتشرح للأمريكيين، أصحاب الأرض، حاجتين في نفس الوقت: الأولى إزاي يراهنوا، والثانية إيه هي كرة القدم أصلًا وقوانينها، وإنها مختلفة عن كرة القدم الأمريكية أو كرة السلة. وبيشرحوا لهم إن المباراة مدتها 90 دقيقة، وإن بعض أنواع المراهنات ليها قواعد خاصة في حالة الوقت الإضافي أو ركلات الترجيح”.

وتابعت: "وبخصوص مباراة مصر ونيوزيلندا، فبعض مواقع المراهنات بتطرح رهانات مركبة، زي التوقع إن مصر تكسب، ولاعب معين يسجل، وإن نيوزيلندا ما تسجلش. الفكرة كلها قائمة على الطمع وإغراء الناس بمكاسب أكبر.. وده طبيعي بعد الأداء القوي للمنتخب المصري أمام بلجيكا، والاهتمام المتزايد بالمنتخب واللاعبين.. ووصل الأمر إن أحد أشهر المراهنين خسر حوالي 9 ملايين دولار بعدما توقع فوز بلجيكا على مصر. رقم ضخم جدًا، خصوصًا إنه اسم معروف في عالم المراهنات".

وقالت لما جبريل: "والأغرب إن المراهنات ما بقتش مرتبطة بنتيجة المباراة فقط، لكن وصلت لأمور غريبة جدًا، زي المراهنة على ما إذا كان كريستيانو رونالدو هيبكي أثناء المباراة أو وهو جالس على دكة البدلاء.. والأعجب إن ناس فعلًا راهنت على الموضوع، ووصلت نسبة اللي توقعوا بكاء رونالدو إلى 66%.

يذكر أن الإعلامية لما جبريل تقدم فقرة متخصصة في التريندات ببرنامج "الحكاية" مع الإعلامي عمرو أديب عبر قناة "إم بي سي مصر"، أسبوعيًا يومي الأحد والإثنين، وتتناول من خلالها ما يحدث على السوشيال ميديا، طوال الأسبوع وكيف يتفاعل معها الجمهور.