عمر كمال يكشف حقيقة طرده من منزل محمد فؤاد
كشف المطرب عمر كمال كواليس علاقته بالفنان محمد فؤاد، مؤكدا أنه يعتبره أستاذه وصاحب فضل كبير عليه في مشواره الفني، وأن حبه له بدأ منذ 30 عاما، بينما تعود بداية علاقتهما إلى 22 عاما، عندما ذهب إليه لأول مرة من أجل الغناء.
وقال الفنان عمر كمال، خلال لقائه مع الإعلامية نهال طايل في برنامج «تفاصيل»، المذاع على قناة «صدى البلد 2»: «أنا والفنان محمد فؤاد دي قصة تتكتب، ده أستاذي، حبي ليه بدأ من 30 سنة، وعلاقتي بيه بدأت من 22 سنة، أول مرة روحت له عشان أغني، الراجل ده عنده حق، مش كل واحد معدي قدام بيته يخبط عليه ينتج له».
وأضاف: «الناس بتقول هو طردني، لكن محصلش، ده ليه فضل كبير عليا، واتعلمت الغناء من خلال أغانيه، والطعم اللي فيا من خلاله، ووقفتي على المسرح من خلاله، ولفيت وراه كل حتة، وكنت أروح دريم بارك الساعة 2 الظهر وأحط البوستر على دماغي وأنام على الأرض عشان أول ما يطلع أعرف أسلم عليه».
وأوضح: «مفيش خلاف بيني وبينه، لكن الصدفة البحتة خلتني في خلاف معاه، فيه منتج مهم جدا صديق للفنان محمد فؤاد، وبينهم ود واحترام، قاله هننتج ألبوم أكتر من 10 أغاني، حصل بينهم خلاف، فمحمد فؤاد قال مش هكمل، فالمنتج معاه ألبوم ومعاه أسماء تخض في الكتابة والتلحين والتوزيع، وكل أغنية متكلفة رقم كبير، راح لفنان قاله هاخد في الأغنية 50 ألف دولار أداء صوتي، روحت أنا قلت له مش عايز ولا قرش بس أغني الألبوم ده».
وتابع: «مكنتش أعرف خالص إن الألبوم ده ليه علاقة بمحمد فؤاد، وبعد ما بدأت أخدت بعض الأغاني اللي تليق معايا، ومن هنا بقينا في اشتباك مع بعض، وأكيد وصله صورة غلط عني، وهو راجل متواضع ومحترم وبينفي عن نفسه فضل تبنيه ليا، لكن أنا من مدرسته وبحبه جدا».

