حمو بيكا لهاني شاكر: ”إحنا عيالك وفي شباب نفسها تتجوز” (فيديو)
اعتذر مؤدي المهرجانات الشعبى حمو بيكا، لنقيب الموسيقيين المطرب هانى شاكر، وجاء ذلك عبر صفحته الشخصية على موقع التواصل الاجتماعي "فيس بوك" .
وقال حمو بيكا: "أنا بتأسفلك يا أستاذ هانى شاكر أنت أمير الغناء العربي، وأنا مكنش قصدى إنى أزعلك، كان كل هدفى إنى أكل عيش، أنا معايا 20 فردا بياكلوا عيش، ناس فاتحة بيوت وبتصرف على عائلاتها، أنا اللى خلانى اضايقت وأنزل الفيديو أنى لفيت 8 ساعات، وشغلى كله كان واقف، وأنا إللى كنت عايز أعمله أنى امشى قانونى واعمل تصريح وانزل اشتغل ومكنش قصدى أنى أزعلك، أنا بحبك وإحنا عيالك يا أستاذ هانى، أنا كان كل هدفى إنى صوتى يوصلك، وقدام الناس كلها بقولك أنا آسف ليك، ولو عايزنى أجيلك أو اطلع على الهواء اتأسفلك هطلع، أنا بقالى 6 أشهر واقف عن العمل، والناس اللى معايا مقدرش امشيهم، إحنا نروح فين دى بلدنا وإحنا اخترنا فن الناس بتحبه وبتفرح بيه عمرنا ماضايقنا حد، وقدمنا محتوى تانى وبقينا ناخد بالنا من الكلام، وبقيت بنقى الكلام الصح" .
اقرأ أيضاً : "ريما" أول فيلم بتقنية 3D.. تعرف على التفاصيل
واختتم حمو بيكا قائلاً : "فى شباب نفسها أنها تتجوز وتكون نفسها، كان يهمنا إننا نشتغل بالحلال، وأنا تعبت وكافحت، ابويا ربانى وطلعنى إنى مقولش لحد عايز حاجه، وبنيت المكان اللى بقيت فيه بعد سنين كتيرة، كان حلمى إنى أعمل حاجة والحمد لله حققت نسبة نجاح كبيرة، وبقى ليا أطفال وشباب وبنات كتيرة بتحبني" .
الجدير بالذكر أن مؤدي المهرجانات الشعبية حمو بيكا، سبق واقتحم النقابة وهدد أعضاء النقابة من خلال فيديو نشره عبر صفحته الشخصية بموقع التواصل الاجتماعي "فيسبوك" .
