الرئيس السيسي: ”الفشل إحنا إللي بنعمله والنجاح إحنا إللي بنعمله”

قال الرئيس عبد الفتاح السيسي تعقيبا على كلمة وزيرة الصحة الدكتورة هالة زايد عن منظومة التأمين الصحي الجديد، إن الدولة حريصة للغاية على التعليم والصحة، وفيما يخص الصحة "كان لازم نعمل تأمين صحي شامل عشان نحقق نتيجة إيجابية، والمفروض هنطلقه النهاردة".

وأضاف الرئيس السيسي، خلال افتتاح عدد من المشروعات بنطاق محافظتي بورسعيد وشمال سيناء، إن الأمر يمر بمرحلتين، المرحلة الأولى هدفها التخفيف والتصدي للحالات الصحية اللي بتواجه الناس، حيث أن هناك  300 ألف هعملية على قوائم الانتظار الآن.

وقال الرئيس عن قوائم الانتظار أيضا "لما بدأنا كان الرقم اللي قدامنا 16 ألف، وإحنا زودنا العدد، والتكلفة المالية لده أكتر من 300 مليار، وعملنا ده عشان ما نخليش أي إنسان مصري محتاج علاج مكلف وحاسم ونسيبه، وإحنا مستمرين في ده، وعقبال ما نصل لنقطة التأمين الصحي الشامل هناخد مدة زمنية طويلة، وعشان كده عملنا المبادرات، ومنها القضاء على فيروس سي واتعمل الفحص الشامل وقدرنا نصل للمواطنين اللي محتاجين العلاج، وعملنا فحص للأمراض غير السارية زي الضغط والسكر، وكمان بنعالجها دلوقتي، ودخلنا على ولادنا شباب الجامعة والثانوي عشان لو حد منهم مريض يتعالج، والمفروض في كل دخول جامعة ومدرسة لا بد من إجراء فحص فيروس سي مرة تانية على حساب الأسرة من الفترة اللي جاية، عشان نتأكد إن ولادنا بيتكشف عليهم كل سنة، والكشف بيتكلف 20 جنيه بس".

وأضاف السيسي، "دخلنا كمان على موضوع سرطان الثدي، وتصدينا للأمر كدولة وعملة حملة للكشف المبكر عن المرض، واتكلمنا عن القواقع السمعية عشان ولادنا اللي مش قادرين يسمعوا كويس، ومبادرة نور حياة عشان نكشف على الأطفال في المراحل التعليمية المختلفة واللي عنده مشكلة نعمل له العملية أو نقدم له النضارة الخاصة بيه، وده كماة للكبار مش الأطفال فقط، وقلنا إننا هنعمل كشف مبكر للسمع لكل الولاد حيثي الولادة، حتى نتمكن من التدخل بشكل مبكر والمضاعافات ما تخليناش نعاني أكتر، وانتهينا بمبادرة الفشل الكلوي".

وأكد الرئيس السيسي حرص الدولة على إنجاح منظومة التأمين الصحي الشامل، قائلا "عشان ينجح لازم جزء الدولة يقوم بيه، وجزء مسئولية على المواطن"، مضيفا "الجزء اللي الدولة هتقدمه هنقدمه بلا تردد، وجزء من الاشتراكات اللي المفروض تتخصم من المواطنين لقاء المشروع، ومفيش رئيس هيقول لحد الكلام ده، لكن أنا بقول كل حاجة لكيم عشان تبقوا فاهمين، وعشان ما نفشلش زي ما الدولة فشلت قبل كده".

وأضاف الرئيس "إحنا قلنا إن فيه 300 ألف في بورسعيد عارفين منهم مين الأسر اللي محتاجة رعاية صحية، وفاضل 600 ألف الدولة حطت رقم لتغطية احتياجاتهم الصحية، وفي جزء على المواطن، يعني المواطن كان بيدفع الأول لنفسه، دلوقتي هيدفع لنفسه ولأسرته، وأنا بقول كده عشان الإعلام يساعدنا هو والرأي العام".

واسترسل الرئيس السيسي قائلا "طبعا كل اللي أنا بقوله ده يتنافى مع السياسية، وغيري بيقول الكلام الجميل بس، ويسيب الكلام الوحش للوزراء عشان صورته تبقى حلوة، لكن أنا هتحاسب على كل كلمة بقولها".

وشدد السيسي على أنه "خلال الـ30 سنة اللي فاتوا كل الخطط اللي اتعملت صح مكانتش بتنجح عشان دايما الدولة كانت بتتعثر في الفلوس، وأنا بقول كده عشان إحنا كلنا مع بعض وبننجح ببعض".

وقال الرئيس السيسي "إنت ممكن تقعد سنوات مش هتحتاج لعلاج، لكن بييجي وقت حد مننا يتعب ونحتاج مئات الآلاف من الجنيهات عشان نتعالج، وعشان كده المشروع تكافلي، الدولة بتساهم فيه والمواطنين كمان".

وأكد الرئيس أن أساس نجاح التامين الصحي الجديد هو التزام المواطن، قائلا "الفشل إحنا اللي بنعمله والنجاح احنا اللي بنعمله، يعني مواطن يروح المستشفى ويقول مش معايا  ومش بتعالج، والناس تصور على فيس بوك ويقولوا الحق التامين الصحي فاشل والناس مش بتتعالج، إحنا بنعمل موضوع لأول مرة، ولازم هيكون فيه نقاط هتظهر ونتعامل معاها، لكن الناس اللي شغالة في المستشفيات ساعدونا لو سمحتم ندي رسالة إن إحنا دولة لو خططت للنجاح قادرة على تنفيذة".