محكمة الأسرة اليوم 2020| بعد 4 سنين جواز.. اتجوز عليا عشان مبخلفش
"بعد 4 سنين جواز، اتجوز عليا عشان مبخلفش"، هكذا بررت زوجه طلبها للخلع أمام محكمة الأسرة بمصر الجديدة.
وقالت الزوجة أمام محكمة الأسرة بمصر الجديدة: " اتجوزت من 4 سنين، جوزي كان هو بالنسبالي كل حاجة الأب والأخ والحبيب والصديق، بس كانت الكارثة لما اكتشتف إني مبخلفش".
وتابعت الزوجة أمام محكمة الأسرة بمصر الجديدة: " قولتله لو عاوز تتجوز معنديش مشكلة، ننفصل بالمعروف، بس لو عاوز تكمل معايا أوعدني متتجوزش عليا، وهو وعدني، وفضل يشد من أذري، ودايما يكبرني وسط الناس، وعمره ماسمح لحد يقول كلمة تضايقني، كان بالنسبة ليا كل حاجة حرفيا، وعمري ماعرفت أبعد عنه لحظة واحدة".
وواصلت الزوجة أمام محكمة الأسرة بمصر الجديدة: " من سنه بدأ يسافر تبع الشغل، ويبات برا ماشكتش فيه عشان مهندس وهو كان مفهمني إنه اترقي وبقى فى منصب لازم يسافر فيه، عمري ما شكيت فيه ولا راقبته لحد ما واحدة صاحبتي قالتلي أنها شافته مع واحدة".
واستكملت الزوجة أمام محكمة الأسرة بمصر الجديدة: " مصدقتش بس بدأت أشك، وراقبته لحد ما نزل من الشغل مرة وراحلها، وأنا روحت وراه وطلعت العمارة، فتحتلي مراته التانية كل ده وأنا بكذب نفسي إنه مش هو أكيد تشابه، أكيد أنا غلط".
وأضافت الزوجة أمام محكمة الأسرة بمصر الجديدة: " لما شوفته معاها مكنتش حاسة بنفسي خالص، كأن حد مسك سكينة وعمال يغرزها في قلبي، روحت البيت وهو جه ورايا، وأنا قفلت الباب على نفسي، وكلم مامته وجات وحاولت تهديني، لما لقتني مصره أمشي قالتلي تستني الأول لحد ما تهدي و تفكري، وفعلا روحت بيت أهلي من قبل رمضان وهو مبطلش أبدا يحاول يكلمني ولا يسأل عليا وأنا بصده، لدرجه مراته التانية جاتلي وحاولت تصلح وأنا متحملتش ومن يومها وأنا تعبانة".
واستطردت الزوجة أمام محكمة الأسرة بمصر الجديدة: " كلمني قبل رمضان، ودي كانت آخر مكالمه خيرته إنه يطلق مراته، أو يطلقني، أنا عارفه إنه غلط خصوصا إن مراته حامل دلوقتي بس أنا مش هقدر أبدا أعيش معاه، وأنا عارفه إن فيه واحدة تانية في حياته هو مرضاش يطلقها، ولا عايز يطلقني قولتله لو مطلقنيش هارفع عليك قضية".
وأكدت الزوجة أمام محكمة الأسرة بمصر الجديدة: " أنا كان شرطي فى العقد قبل الجواز إنه ميتجوزش عليا واحده تانية، أنا كان عندى عقدة نفسية من زمان من موضوع الجواز والخيانة، ومكنش قدامي غير محكمة الأسرة".
ولا تزال الدعوى منظورة إلى الآن أمام محكمة الأسرة تنتظر الحكم.
