محكمة الأسرة اليوم 2020| مراتي مدير عام.. زوج يرفض ترقية زوجته بسبب رجولته

على طريقة فيلم "مراتي مدير عام"، صلاح ذو الفقار يتعنت لترقية زوجته شادية، لتمارس هي مهام وظيفتها فى المصلحة ويعود هو للمنزل ويمارس سطوته كزوج عليها، ومن ثم تتخلي عن عملها لاستمرار حياتها.

"جوزي رافض ترقيتي، بعد ٦ سنين مرار فى الشغل، رافض أكون أعلي منه، وواقف فى طريق مستقبلي ونجاحي"، هكذا بررت زوجة دعواها للخلع أمام محكمة الأسرة بالزنانيرى.

وأضافت الزوجة فى دعواها أمام محكمة الأسرة بالزنانيرى: " اتجوزنا عن طريق أصحابنا، واتعهد إن عمره ماهيقف ضد مستقبلي، اشترطت عليه إنه ميتعرضش لشغلي وهو وافق، وبعد ٦شهور كنا فى بيت واحد " .

وقالت الزوجة فى دعواها أمام محكمة الأسرة بالزنانيرى: " بعد ما جمعنا بيت واحد اكتشفت إنه شخص غريب عني، وكل الكلام حبر على ورق، هو شايف نفسه 《سي السيد》، عاوز يؤمر وأنا أطيعه، حاولت أنبه كتير إننا فى القرن ال-٢١، بس هو مقتنعش، ورغم إن شغلي مش بيتعارض مع أنوثتي أو بيتي، كان دايما يتهمني إني راجل ومش ست، وكل ده بسبب إني ناجحة فى شغلى، ولما وثفت قدامه ورفضت إهاناته وهددته بإني هسيب البيت سكت وتقبل الوضع شوية ".

وتابعت الزوجة فى دعواها أمام محكمة الأسرة بالزنانيرى : " جوزي محاسب فى البنك، وأنا سنتين مستحملاه ومستحملة تعبي معاه، لحد ما اترقيت فى شغلى لرئيس قسم، وترأست أكتر من ٥٠ رجلا، بسبب كفائتي ونجاحي فى الشغل، ورفض إني استلم منصبي وحط منصبي فى كفة وزواجي منه فى كفة تانية، ورغم إنه عارف إن الترقية دى نتيجة ٦ سنين تعب بس صمم إني مقبلش بيها ".

وأضافت الزوجة فى دعواها أمام محكمة الأسرة بالزنانيرى: " جوزي اتهمني إني خاينة عشان منصبي أعلي من منصبه، وبيقولي إزاى هتتعاملي مع الرجالة دي ويعرف يثق فيا تاني، وإزاي هيعرف يثق فيا وأنا منصبي أعلى من منصبه، وضربني لأول مرة في حياتي، لما واجهته واتهته بالتخلف، ولما سيبت البيت ومشيت وصل لمكان شغلى وعملي فضيحة هناك، ورفع عليا قضية شذوذ فقررت بعدها إني مش هكمل معاه، ومكنش قدامي غير محكمة الأسرة .

ولا تزال الدعوى منظورة إلى الآن تنتظر الحكم.