رسالة مؤثرة من حفيد حسن حسني لجده بعد رحيله: ضهرنا اتكسر
وجه الشاب حسن هشام، حفيد الفنان الكبير حسن حسني، رسالة مؤثرة إلى جده الذي وافته المنية فجر السبت الماضي، عن عمر يناهز 89 عاما.
وكتب حفيد حسن حسني، عبر حسابه بموقع التواصل الاجتماعي "فيسبوك": "أي حد لما كان بيعرف إني حفيدك كنت بلاقي فرحة في عينه ونظرة احترام وتقدير، الحاجات دي كانت دايما بتفرحني وببقى شايف قد إيه الناس حباك حتى لو ماتعاملتش معاك شخصيا، وقد إيه أنا فخور إني حفيدك ومتشرف وفي كذا حد كنت وعده إنه هيشوفك، وجود اسمك في بطاقتي وإني شايل اسمك كان بالنسبالي أمان وفخر، وعشان كده كنت دايما واخد بالي في معاملتي مع الناس وإني اتعلمت منك إن حب الناس بالدنيا كلها، وفكرة إني شايل اسمك دي مسؤولية كبيرة".
اقرأ أيضا| نجل حسن حسني يحبس دموعه ويكشف عن وصيته الأخيرة (فيديو)
وأضاف: "بحاول دايما إني أبقى ناجح عشان أشرفك عشان أنت دايما كنت واقف في ضهر كل واحد فينا أنا وأخواتي اللي هما كل أحفادك وكنت دايما بتنصحني، وأكتر حاجات نصحتني بيها هي حب الناس وإن مشوار الألف ميل بيبدأ بخطوة وإني مايأسش، وكمان حضرتك بركتنا ومثلنا الأعلى وعلمتنا فعل الخير وعودتنا دايما إننا نتجمع ونخاف على بعض وكنت دايما بتخاف علينا من أصغرنا لأكبرنا".
تابع: "عمرك ما حسستنا إنك جد، على قد ما كنت صاحب كل واحد فينا وكل واحد فينا كان ليه معزة خاصة عندك وكنت حنين علينا قوي وقلبك أبيض ومصدر الطيبة، كانت الناس دايما بتسألني عنك وعن معاملتك معانا كنت دايما بقولهم إنك بركتنا وقد إيه طيب وحنين ومصدر البهجة في العيلة وإنك ضهرنا اللي اتكسر دلوقتي، واللي الناس ماتعرفوش إنك كنت بتضحكنا في الحقيقة أكتر من ورا الكاميرا وإن تقريبا كل الشخصيات اللي مثلتها إحنا عشناها".
واستكمل: "عشان دايما كنت مش بتحب تتعبنا ومش بتقل علينا فضحكت علينا وسبتنا في ٢٤ ساعة مع إني كان نفسي تفضل معانا لغاية لما تشوفني أنا وكل أخواتي الـ ٥ في بيوتنا وتشوف أولادنا.. لكن أمر الله نفذ ولا اعتراض على قضاء ربنا والبهجة راحت معاك، ومصر والدول العربية كلها عزونا وحسوا بآلامنا لإنك كنت موجود داخل كل بيت وأجيال كتير اتربت على إفيهاتك وكنت فعلا جوكر عشان زي ما بتعرف تضحكنا زي ما بتعرف تبكينا".
واختتم حفيد حسن حسني رسالته لجده قائلا: "مهما اتكلمت وقلت مفيش كلام يوصفك أو يوصف جمال روحك الحلوة اللي هنفضل عايشين بيها حوالينا، أنا فعلا محظوظ إني اتولدت حفيدك وإني شايل اسمك وعارف إنك دلوقتي في مكان أحسن بكتير وإنك مع جدتي وبنتك اللي كانت أقرب حد ليا واللي من ساعة فراقها وأنت تعبان، دلوقتي حضرتك ارتحت فيارب أبقى محظوظ أكتر واحصلكوا وابقى مرتاح معاكو عما قريب إن شاء الله".
يشار إلى أن آخر عمل فني شارك فيه الفنان الراحل حسن حسني كان من خلال مسلسل "سلطانة المعز" مع الفنانة غادة عبد الرازق، بينما آخر ظهور سينمائي له كان في موسم عيد الأضحى 2019 مع أحمد حلمي في فيلم "خيال مآتة".
