المذيع عمرو صلاح يعلن شفاءه من كوفيد 19: كورونا مش بعبع
أعلن الإذاعي عمرو صلاح، مقدم البرامج بإذاعة نغم FM، مساء اليوم الخميس، تعافيه من فيروس كورونا المستجد (كوفيد 19.
ونشر عمرو صلاح، عبر حسابه الشخصي بموقع التواصل الاجتماعي "فيسبوك"، صورة تجمعه بالطيب المعالج، وعلّق: "النهاردة بعد الأشعة والتحاليل الحمد لله أتأكدت إني خلصت من الضيف الرخم، اللي جه وخد راحته عندي شوية.. عدت على خير الحمد لله يارب.. شكرا لكل واحد أهتم وسأل، شكرا لكل واحد قدّملي دعم ولو بكلمة، والكلمة أهم حاجة في الوقت ده..
شكرا لكل صديق حقيقي بان معدنه في الفترة دي.. شكر كبير جدا لوزير الإعلام أسامة هيكل على اتصاله وإنه يطمن على كل الإعلاميين.. وربنا إن شاء الله يقومه بالسلامة قريب".
اقرأ أيضا| فى حوار لـ”الطريق”.. ناردين فرج: ”ليه لأ” مسلسل بناتى جدًا
أضاف: "خلاصة شهر كورونا.. وأنت بتكتب بوست مليان طاقة سلبية وندب.. خد بالك إن ناس كتير عندها كورونا بتقرأه فالحالة النفسية عندهم مش ناقصة.. الحالة النفسية مهمة بنسبة 50% في العلاج.. أقسم بالله أكتر ناس تعبت وبتتعب وهتتعب دلوقتي الدكاترة والتمريض وعمال النظافة في المستشفيات.. على قد ما تقدروا ادعموهم ولو نفسيا".
تابع: "متصدقش الأخبار المحبطة اللي مالية الفيس بوك.. صدق اللي تشوفه بعنيك.. أقسم بالله الفيس بوك وغيره ما هو إلا خدعة.. ولو حسيت بأي وجع بسيط أستشير دكتور، حل الموضوع في أوله أسهل ما بتسيبه.. ماتخفش كورونا مش بعبع أوي كده زي ما الناس خايفة والدليل حالات الشفاء العالية.. في الأزمة دي لو لا قدر الله دخلت مستشفى هتطلع بصحاب حقيقيين منها لأن حالتكم كانت واحدة وكنتم داعمين نفسيا جدا لبعض وعديتوا الأزمة مع بعض".
وأكمل: "اللي بيسأل الشباب بتموت منه.. فهقولك إني سألت الدكتورة وقالتلي إن نسب التعرض لكمية الفيروس هى اللي بتفرق في الشفاء.. علشان كده الكمامات حتى لو خالطت حد بتقل من الرزاز.. فلو لا قدر الله حتى خدت الفيرس فهيكون بنسبة قليلة.. في هيجيلك بأعراض خفيفة ويعدي".
واختتم: "وأخيرا.. من ساعة ما بنتولد ربنا كاتب لكل واحد هيعيش قد إيه في الدنيا بالثانية.. فكورونا أو غيره ما هو إلا سبب لانتهاء وقتك في الأرض.. متخفوش وهتعدي قريب إن شاء الله".
