قصيدة| مش بلومك!
مش بلومك
دايمًا وجودي بيجي في الوقت الغلط
والدنيا صعب على اللي زيي يعيشها بإيمان مُنتَصِر
دايمًا ليالي البرد تقرُص وحدتي
ومفيش إيدين تمسح دموعي ساعتها إلا مخدّتي
إيد البشر صبَّار بيجرح وردتي
وإيديا أضعف من ورقة شيلاها الرياح
ف بتختفي
وبتنطفي
وبتتكسر
وتعود سراب ..
مش بلومك
فمتعتذرش عن الغياب
وعن الوجود ويَّايا بالشكل الوسَط
الدنيا أكبر خِدعة للعايز يعيش
هتحط ليك الفرحة من جوا الرغيف
وبقطمة واحدة تلاقي كل الحشو زيف
وبرغم صدمة معدتَك مطلوب تكمِّل ضحك وتعيش بانتشاء
الدنيا مش هتكون شبهنا
الدنيا تشبه للفراق ..
زي المحطة تعدّي عليا كل قطارات الزمن
ثابتة
لا بتحرَّك
لا بتحوَّل
ولا..
قضباني مرة بيشكي م الوداع
الناس بتيجي وتمشي وبسجِّل غياب
مشهد بيتكرر يوماتي
وفي اندهاش
بَسحب ستارة البُعد واحدِفلَك سلام
إن كنت عايز تهجُر
اهجُر من سُكات
هات المشاعر من إيديها وزُقّها
علِّمها ما تحنِّش لحد
اربُط عنيها وضُمها
واحلف بإن الوعد المرة دي هو اللي هان
