”أصابني الإحباط”.. محمد عطية يكشف مواقف مؤلمة بعد ”ستار أكاديمي”
فاجيء الفنان محمد عطية متابعيه وجمهوره بكشفه فترة الاضطرابات والمواقف المؤلمة التي مر بها عقب فوزه في الموسم الأول من برنامج "ستار أكاديمي".
وشارك الفنان محمد عطية متابعيه وجمهوره بتعليقه عبر صفحته الرسمية بموقع التواصل الاجتماعي لتبادل الصور والفيديوهات انستجرام، وكتب: "كلنا عندنا في حياتنا نقطة كنا واصلين فيها لمرحلة من النجاح أكتر من أي وقت سواء في شغل أو علاقة أو أي حاجة تانية.. دايما النقطة دي كل ما بتبعد كل ما بنفقد الثقة في نفسنا".
وأضاف: "وفي قدرتنا على إعادتها تاني، وبتبدأ تنسى إن أنت نفس الشخص اللي قدر يوصل للنقطة دي، أحسن نسخة منك، وبتحاول تعيد نفس النجاح ده تاني بنفس الطرق بس ما بتنجحش، فتبدأ تلوم كل العوامل إلا نفسك، وبتبدأ تتحول أنجح مرحلة في حياتك للعنة.. خصوصا لما تلاقي اللي حواليك بيفكروك بيها".
وكتب أيضًا: "مرة بهزار ومرة بجد ومرة بلوم مرة بسخافة فتلاقى نفسك بتطلع منك ابتسامة صفرا، وتبدأ تدخل في دايرة إحباط، النقطة دي كانت بالنسبالي هي ستار أكاديمي، دي أنجح مرحلة في حياتي دخلت في كل الدواير اللي قلتها فوق، وسمعت هزار وجد وجمل من نوعية إنت لسه عايش ياااه.. حسيت في أوقات كتير باللعنة دي، لحد ما وقفت مع نفسي واستوعبت إني نفس الشخص".
واستكمل كلامه: "وإن زي ما قدرت أوصل للنقطة دي في حياتي أقدر أوصلها تاني، بس لازم أكون مدرك الصعوبة واختلاف الظروف والعوامل وزي ما لقيت طريقة قبل كده أوصل للنقطة دي، لازم ألاقي طريقة تانية تناسب الظروف الحالية عشان أوصلها تاني".
اقرأ أيضًا: قبل حفلة مكتبة الإسكندرية غدا.. صابر الرباعي يشارك جمهوره هذا الفيديو
واختتم تعليقه: "أول حاجة إني بيني وبين نفسي لازم أكون نسخة أحسن من النسخة اللي نجحت النجاح ده و بعدها أبدأ أدور بيها على نجاح أكبر، وإني لازم أبطل ألوم الظروف.. الظروف موجودة وهتفضل موجودة، ولازم أكون صريح مع نفسي وأعرف حجمي الحالي عشان أبدأ منه وما أبدأش من وهم، وقبل كل ده لازم أبقى مؤمن بنفسي ومقتنع إني أقدر أعمل ده تاني، بحاول حاليا ولو فشلت هحاول تاني وتالت.. أنا نفس الشخص اللي عمل النجاح ده مرة.. أنا نفس الشخص اللي أقدر أعمله تاني".
