ميرنا وليد: «مش قادرة انسى دموع رجالة منتخبنا»
وجهت الفنانة ميرنا وليد، رسالة خاصة عن دموع لاعبي منتخب مصر بعد خسارتهم أمس أمام فريق السنغال، في نهائي كأس الأمم الإفريقية.
وكتبت ميرنا وليد، عبر حسابها الشخصي بموقع التواصل الاجتماعي فيسبوك: "الماتش خلص وبقينا تاني يوم وأنا مش قادره أنسى دموع رجاله منتخبنا إمبارح، وشوشهم وتعبيراتها بدموعهم مش راضيه تروح من عينيا".
وتابعت: "إحنا عيطنا معاهم مش عشان خسرنا الماتش لا خالص الترتيب التاني في قارة كاملة ده نجاح كبير لازم نشكرهم عليه، هم حاربوا بكل قوتهم ما قصروش في أي حاجه، دموعهم ما كانتش لسبب شخصي كلهم مشهورين وناجحين جدا وبيشتغلوا في أنديه كبيرة خلاص ومستواهم عالي جدا".
واستكملت: "معروف دموعهم كانت لأنهم كان نفسهم يرجعوا بالكأس لناسهم وجمهورهم كان نفسهم يتوجوا اسم مصر بالكأس ويفرحوا ناس بلدهم وحاولوا والحظ على آخر ثانيه ما كانش في صالحهم بس مش أكتر، بصراحه عياطي كان فيه حته فرحه برضه، حسيت بالفخر برجالتنا اللي لما الموضوع بيتعلق باسم مصر الموضوع عندهم يوصل للدموع منهم والقهر باين في عيونهم عشان ما جابولهاش الكاس".
واختتمت: "والله يا مصر يا بختك بولادك حقيقي البلد دي فيها رجاله بيحبوها وبيخافوا عليها ويحاربوا عشانها وده في كل المجالات اللي في الكوره واللي على الحدود واللي بيحمي أمنها جوه شوارعها كل واحد في مجاله أيا كان لكن السبب واحد، حبهم لمصر، وده مصدر الأمان للبلد دي السر في حب ولادها ليها، والله فرحانه بيهم قوي، أرجوكم وصلولهم ده في استقبالكم ليهم، هم عيطوا عشان كان نفسهم يفرحونا فهموهم إننا فرحنا بيهم فعلا وبمجهودهم وباصرارهم، لازم نستقبلهم استقبال الأبطال لأنهم فعلا كده جدا ويستحقوا، تحيه حب واحترام ليهم كلهم فرد فرد، يا ولاد اللذين حاتخلوني أحب الكوره وأنا ماكانش ليا فيها أصلا".
اقرأ أيضًا: محمد عز يدعم مصر قبل مواجهة السنغال بنهائي كأس الأمم الإفريقية
