مجدي عبد الغني: فين المانجا «الرشوة» يا شيحة؟

وجه الإعلامي مجدي عبد الغني هجومًا حادًا على محمد شيحة، وكيل اللاعبين وخبير التسويق الرياضي، بسبب تَغير معاملته معه بعد خروجه من الاتحاد المصري لكرة القدم.

وقال مجدي عبد الغني عبر برنامجه على قناة "الشمس": "ده حتى المانجا اللي كان بيبعتها شيحة واحنا أعضاء في اتحاد الكورة، بطل يبعتها بعد ما خرجنا من اتحاد الكورة".

وأضاف: "طب هي المانجا كانت رشوة يا عم شيحة؟ يعني انت بتهادينا مانجا واحنا أعضاء اتحاد الكورة وأما خرجنا؟! مش تكمل هداياك وتجيب المانجا؟".

وتابع: "ما أنا لما اروح اتحاد الكورة لو ربنا أذن لي ورجعت مش هاخد منك مانجا تاني، لو حلفت على المانجا تبرد مش هناخد منك حاجة، لأن عرفنا انت بتقدمها ليه".

وواصل: "يجيبها دلوقتي وأنا بره الإتحاد، يا شيحة لو المانجا ماجتش دلوقتي مش هاخدها وأنا عضو اتحاد".

ورد محمد شيحة في مداخلة هاتفية على حديث مجدي عبد الغني قائلا: "يا كابتن انت من 2019 بره الاتحاد وأنا ببعت المانجا في معادها".

قبل أن يقاطعة عبد الغني قائلا: "السنة دي يا أبو الشيح انت أخرتها شوية فأنا قلقت"، ليرد شيحة قائلا: "لسه في شهر 8 يا كابتن، احنا بنجيبلك الأورجانك مش اللي مرشوشة".