مراد فكري صادق يدافع عن والده: «ولا سب وقذف لأي حد»
رد الفنان مراد فكري على الانتقادات التي تعرض لها والده بعد تصريحاته الأخيرة عن الفنان الراحل سعيد صالح، إذ قال إن موهبته لم تكن فريدة من نوعها، بل كانت عادية.
وكتب مراد فكري، عبر حسابه الشخصي "فيس بوك": "اختي الغالية والفنانة بنت الأصول هند سعيد صالح، طبعا أنتي تعلمي جيدا عشقي واحترامي وتقديري للنجم الكبير سعيد صالح و تاريخه منذ صغرس حتى تخرجنا أنا وأنتي من سنين زملاء وأخوات من المعهد العالي للسينما".
وأضاف: "إحنا أكبر من إننا نتكلم على صفحات الفيس بوك يا بنت عمي وعمنا كلنا، وهو بنفسه قال في كذا لقاء قبل كده إن علاقته بالفنان سعيد صالح وعادل إمام كانت علاقة صداقة بعيد عن الفن واشتغلوا سوا كتير وكل واحد مننا ممكن يقول كلمة عفوية لأن دة جيل عظيم و فاهم و واعى وخصوصا إنهم جيل واحد كمان 
والجيل دة معروف بالحب أصلا لحد دلوقتي كمان".
وتابع: "وإن كانت كلمة طلعت غلط أو سوء تفاهم حصل بشكل مفاجئ مش معناه إنه غلط لا سمح الله وراعوا يا جماعة كبر السن والعفوية في الكلام للناس الكبار، الناس دى فنانين كبار وأكبر من اننا نلوم عليهم أو نحاسبه بالكلمة، لأن سعيد صالح دة نجم كبير وفكري صادق فنان كبير برضو، وشكرآ المهتمين وعارفين أن دة مش طبع والدي وأن عمره في الوسط الفني ما حد زعل منه ... الحمد لله إحنا ناس في حالنا مش بتوع مشاكل ولا تريند علشان الناس تعرف مين فكرى صادق أو نقيس بالتريند شعبية نجم كبير زى الأستاذ سعيد صالح ؟؟؟".
وأكمل: "وربنا يرحم الجميع كل من عليها فان يا جماعة وكلمة (فنان عادى) كلمة لا تقليل شأن ولا سب و قذف لأى حد .. وأنا بيربطنى صداقة وزمالة مع أختى المونتيرة المبدعة (هند سعيد صالح) من خلال المعهد العالى للسينما وأنا من عشاق النجم سعيد صالح واشتغلت معاه مسلسل وكان إنسان جميل ودمه زى العسل وقعدنا اتكلمنا كتير عن ذكرياته هو وأبويا سوا كتير... ورغم ظروفه المرضية إلا أنه كان قيمة كبيرة جدا فى المكان والناس الكبيرة بيبقى معاهم عذرهم أحيان كتير .. طالما لا يوجد إهانة أو سب لا سمح الله .. يبقا الموضوع سوء تفاهم ولازم توضيحه بشكل صحيح للناس فى أقرب وقت .. ولكل عشاق النجم سعيد صالح وأنا أولهم طبعا".
وأردف: "بس احتراما منكم و رجاء وليس أمر من حضراتكم، بلاش نكبر المواضيع ونشمت في بعض بالسرعة دي ونعلق لبعض المشانق علشان ممكن الحكاية تتفخم ويبقا موقف و يزعل ناس وأخوات وأصدقاء من بعض عشرتهم وصداقتهم قد عمر جيل كامل زي جيلنا الحالي، وستستمر العلاقة الطيبة بين الأبناء لأخر العمر بأذن الله ولن تتغير او تفسد بسبب كلمة أو وجهة نظر اتقالت على الهوا بشكل عفوي، دون مونتاج أو تجميل للكلام من فنان له تاريخه وأعماله وعمره يتجاوز السبعين الحمد لله وهو والدي الفنان فكرى صادق".
وأختتم مراد فكري: "والله يا جماعة إللي حصل دة بيحصل في معظم البرامج المسجلة وبيحصل اكتر من كدة كمان وكلنا عارفين و فاهمين، و بيتم تظبيط الكلام كله فى المونتاج قبل عرض حلقة الضيف وأختي هند سعيد صالح تعلم هذا من خلال عملها مونتيرة لها بصمتها فى فن المونتاج لأكثر من برنامج لكن برنامج الاستاذة لميس الحديدي، برنامج على الهواء مباشرة لو كانت حلقة متسلة ماكانش حصل كل دة، الحمد لله و كامل اعتذاري بشكل اخوي لأختي الغالية هند سعيد صالح وللنجم الراحل سعيد صالح و دة اعتذار رسمي وأتمنى يكون كلامي واضح حاجات كتيرة، للناس، شكرا".
اقرأ أيضًا: تامر حبيب يشيد بمسلسل «الليلة واللي فيها»: شكرًا لكل من ساهم في جعلي مستمتعًا
