حبيبك يبلعلك الزلط.. مفيدة شيحة تكشف خرافات الأمثال الشعبية
أكدت الإعلامية مفيدة شيحة، أن هناك أمثال شعبية يرددها البعض كل يوم ليس لها أي صلة بالواقعة، ومجرد كلمات تتناقلها الأجيال دون أي فائدة.
وأضافت شيحة، مقدمة برنامج الستات، المذاع عبر قناة النهار وان، مساء اليوم الإثنين، أن :"لو صابعك وجعك.. متقطعوش.. عالجه.. تقطعه ليه العنف دا.. دا صابعك انت.. هتتعصب على نفسك وتقطع في نفسك عشان اتألمت؟ مش دي حاجة عجيبة بالذمة؟ العقل والرحمة.. استوعب نفسك وألمك وتجربتك.. وخلي مخك كبير على اد جسمك..!!".
وتابعت مفيدة شيحة: "لما تتلسع من الشوربة.. ليه تنفخ في الزبادي؟، دا معناه انك مااستفدش من التجربة.. معناه انك بتغلط اكتر من الاول.. و بقيت شكاك و متوقع المخاوف في كل حاجة..، والمعقول انك تستفيد من التجربة و تنتبه للحاجات السخنة.. السخنة.. مش تنفخ في الزبادي او تنفخ في التلج؟! ".
وأكملت مفيدة شيحة: "اللي ميشوفش من الغربال يبقى.. عاوز يشوف أوضح.. عاوز يحقق و يدقق و يشوف كل أجزاء وتفاصيل الصورة.. و يكون رأي ووجهة نظر متكاملة!، وحبيبك يبلع لك الزلط.. ليه يا بابا.. ليه تحب واحد وتأكله زلط، وهل دا حب ياناس ؟ يا أخي أكرهه.. ياريتك محبيته و تسيبه في حاله!! الله الغني عن زلطك وحبك!!.
واختتمت مفيدة شيحة، قائلة: "اللي رقصوا ع السلم.. ممكن يتشافوا ويتسمعوا ويشتهروا أوي كمان.. الناس داخلة في حياة بعض بكل سهولة.. متطوعين أنهم يعرفوا كل حاجة عن بعض وبدون هدف..!!، والضحك من غير سبب.. قوة و ذكاء وإيجابية وتفاؤل.. ممكن يكون الضحك قلة أدب ازاي؟ امال النكد يبقى ايه.. ثم ما عيب إلا العيب معروفة!! ".
