التقارير

ضجة على السوشيال بعد ارتفاع سعر اللحمة.. وآراء متباينة للحل

الأحد، 12 فبراير 2023 08:03 مـ بتوقيت القاهرة

تصدر سعر كيلو اللحم تريند مصر على مواقع التواصل الاجتماعي، بعد ارتفاع أسعار اللحوم، ليتراوح سعر كيلو اللحم من 240 إلى 280 جنيه، الأمر الذي أثار حالة من السخرية من مستخدمو السوشيال ميديا، فالبعض طالب بمقاطعتها من خلال حملة "خليها تعفن"، بينما أكد آخرون أن ارتفاع سعر كيلو اللحمة بسبب التاجر الذي لا يقل مكسبه في الذبيحة الواحدة عن 21 ألف جنيه.

ارتفاع سعر كيلو اللحمة

سخر أحد مستخدمي مواقع التواصل الاجتماعي، من ارتفاع سعر كيلو اللحمة، كاتباً: "كيلو وصل 250 جنيه يعني دلوقتي هتروح للجزار هتقوله عايز حته ب 50".

واقتراح من خلال منشور عبر مواقع التواصل

الاجتماعي"فيس بوك"، حلا للقضاء على ارتفاع سعر كيلو اللحمة، لافتا إلى أن الأهالي يشاركون في شراء عجل ويقسمه بينهما، كاتبا "بما أني سعر كيلو اللحمة بقا غالي في فكرة خارج الصندوق، كما لسه منعرفش سعرها حيوصل كام فى رمضان طب ليه الأهالي ما يتشاركوش في عِجل مثل الأضحية فى موسم الحج ويقسموه بينهم؟ وعلى فكرة بالورقة والقلم الكيلو هيكون ب 150 جنيه بس".

خليها تغفن

علق أحد النشطاء، على الاقتراح، كاتباً:" خليها تعفن قاطع مش هتموت من قلة أكل اللحمة يعني ما كدا كدا العجل هيكون غالي وسعر السيل والذبح هيكون نفس السعر الغالي.. يعني قاطع وخلي الجزار يفضل دابح وقاعد جمب الدبيحة"

وعلقت أخرى: "كيلو اللحمة ب 260 جنيه وكيلو الفراخ ب 90 جنيه والبانية ب 200 جنيه.. خليها الحاجات تعفن عند الجزار".

بينما سخرت أخرى، "بعد وصل اللحمة ل260جنيه هدخل عند الجزار بقلب وضميرى مرتاح أقوله ينفع أقسط؟!"

وتساءل أحد مستخدمي مواقع التواصل الاجتماعي، عن مقطعة اللحوم بعد ارتفاع الأسعار، كاتباً "كيلو اللحمة ب280جنيه فلما تسمع حد بيقول لصاحبه جبت حتة ب 50 اوعى تفتكره مدمن ممكن تكون لحمة عادي.. مين هيقاطع؟!"

وفسر أحد رواد مواقع التواصل الاجتماعي، سر ارتفاع سعر كيلو اللحمة، قايلا: " هقول لسادة الجزارين كلمتين لوجه الله تعالى أنت بتجيب الدبيحة من السوق وهنفترض أن وزنها 500 كيلو وعاملة في السوق 35 أو 40 ألف جنيه، وبعد الدبح هتعمل معاك لحم مشفي350 كيلو.. ياريت تحترموا عقلنا شويه هنحسب على سعر الكيلو 170 جنيه يعني 350 ك×170ثمن البيع =59,500 ألف جنيه، وكمان هتبيع كرشة وكبده وجلد وعظم الخ هتعمل كمان 2000جنيه، يبقي الإجمالي 61,500، نطرح 500 نقل عربية من السوق يبقي المتبقي مع حضرتك 61,000 ألف نطرح 40,000 ثمن الدبيحة يبقي المتبقي وصافي الربح 21,000 ألف ربنا يباركلك في رزقك ويزيدك بالحلال .. وبلاش تغلى على الغلابة".