«جوزي التاني نصب عليا ومش ندمانة على فستان البطانة».. أبرز تصريحات رانيا يوسف في «حبر سري»
حلت الفنانة رانيا يوسف ضيفة في أولى حلقات برنامج "حبر سري" مع الإعلامية أسما إبراهيم، وكشفت رانيا يوسف خلال الحلقة العديد من الأسرار حول حياتها الشخصية وجوازاتها الثلاثة، إلى جانب حديثها عن علاقتها ببعض الزملاء في الوسط الفني.
وفي السطور التالية نرصد لكم أبرز تصريحات رانيا يوسف في برنامج حبر سري.
- اتجوزت 3 مرات رسمي وكانوا 3 غلطات.. واللي بتطلق بتبقى قمر.
- زوجي التاني نصب عليا وقالي إنه هيعمل مشروع وطلع مفيش حاجة، وخسرت فلوسي كلها.
- محدش ساعدني في مشواري حتى بمكالمة تليفون، ونجوميتي عملتها بنفسي.
- لحد دلوقتي حظي قليل في الرجالة، بس حلو في حاجات تانية.
- معملتش أى عمليات تجميل غير أنفي، لإني معنديش حاجة تتشد.
- أنا مسالمة جدًا، بس اللي بييجي عليا أو على بناتي هخربشة.
- فستان البطانة غلطة بس مش ندمانة عليها.
- مفيش أى حاجة تجبرني أتجوز عرفي، حتى لو عمرو دياب هو مين في الآخر يعني.
- نجوميتي أكتر من زينة، وهى كانت بديلة لروبي في مسلسل أرض النعام وجت بعد شهرين تصوير.
- زينة اشترطت إن اسمها يتحط معايا في العقد، وده كان خلاف للاتفاق ودفع الشرط الجزائي.
- أحمد الفيشاوي مش عاتق ستات كبيرة وصغيرة، ولو اتقدملي مش هوافق.
- لما اتجوزت محمد مختار مساعدنيش خالص، وراح أنتج لطليقته.
- ولما رفعت خلع واتطلقت منه كنت بحبه، وقعد فترة على ما خرجت من الموضوع ده.
- بعتذر لغادة عبد الرازق لإني كنت فاهمه إن هى اللي شالت مشاهدي من فيلم ريكلام، بس طلع المخرج.
- عايزة اتجوز واحد أتسند عليه ويتسند عليا وأحبه، ولكن أول 3 شهور بس بيبقوا حلوين وبعد كده خلاص.
- نفسي بناتي يبقى عندهم جرأة زيي، وأنا بعمل اللي أنا عيزاه طالما مش بغضب ربنا.
- ممكن أتجوز واحد أصغر مني ب 20 سنة لو بحبه، وأبو بناتي كان أكبر مني ب 30 سنة وكنت بحبه.
- نادية الجندي نجوميتها أكتر مني وهى بقالها 50 سنة بتمثل، لكن أنا عمري كله كام سنة.
- نادية الجندي كان عندها عوامل مساعدة محمد مختار كان بينتجلها وكانت بتطلب منه ده وكانت بتدخل شريكة في الإنتاج.
- محدش بيتحمل مسئولية بناتي غيري ومحدش بيصرف عليهم، وباباهم بعيد عنهم ودي رغبته.
