نيللي كريم في حوارها لـ«الطريق»: كنت أنسى مشاهدي في عملة نادرة بسبب انبهاري بأداء جمال سليمان.. ومصحح لغوي ساعدني
- أشعر بمتعة عند مشاهدة المسلسلات الصعيدية
- مصحح لغوي ساعدني كثيرًا
- العدل جروب اعتبرها بمثابة ضهر قوي يسندني
اعتاد الجمهور على أن تقدم الفنانة نيللي كريم مفاجأة جديدة ومختلفة لهم كل عام، وفي موسم مسلسلات رمضان 2023، تقدم وجبة دسمة بالعمل الصعيدي «عملة نادرة»، إذ تجسد شخصية نادرة التي تواجه الكثير من الصراعات.
جريدة وموقع «الطريق»، آجرى حوارًا مع الفنانة نيللي كريم للحديث عن تقديمها الدراما الصعيدية من خلال مسلسل «عملة نادرة»، وتعاونها المتكرر مع شركة العدل جروب.
إلى نص الحوار..
ما رأيك في المشاركة بعمل صعيدي هذا العام؟
من زمان وأنا بستمتع جدًا وأنا بتفرج على أي مسلسل صعيدي، وخصوصًا المسلسل اللي بيخليني أشوف تراث الصعيد لأن اللي مراحش الصعيد أظن مشفش مصر كويس، أنا لما روحت الأقصر حسيت بانبهار بسبب النيل وسحره وجماله وجمال الناس هناك، وفي كل مرة بزور فيها الصعير بسرح مع البيوت وبالقصص اللي جواها لأن أكيد ورا كل باب حكاية ممكن تتقدم في عمل درامي ممتع.
كيف حضرتِ لدور نادرة؟
ذاكرت كويس اللهجة الصعيدية واتفرجت على مسلسلات صعيدية كتيرة بدون ما اتأثر بحاجة منهم عشان حبيت إن نادرة تكون مش شبه شخصيات تانية.
لم تخافِ من تقديم اللهجة الصعيدية؟
مش هنكر، خوفت في البداية من إني اتكلم صعيدي، لكن الحمدلله المصحح اللغوي عبد النبي الهواري ساعدني كتير في إني اتكلم صعيدي كويس بسبب خبرته الواسعة ولأنه عاشق للصعيد والعادات والتقاليد والتراث.
عبد النبي الهواري طلب مني في الأول إنه يسمع صوتي في الصعيدي وأنا واتدربنا كتير لحد ما وصلت للمستوى ده واللي سعيدة بيه جدًا لأن فرق معايا.
حدثينا عن العمل مع جمال سليمان..
حسيت إني مطمنة بوجوده في العمل لأني اخيرًا مثلت معاه لأنه عنده خبرة قوية وفي مشاهد قوية جدًا بتجمعنا في المسلسل سعيدة بيها، لدرجة إني في بعض مشاهد كنت بقف قدام تمثيله واتفرج على اداءه وانسى دوري.
تقفين أيضًا أمام الفنان كمال ابو رية وهو خبرة في الأعمال الصعيدية..
ده فنان عنده خبرة كبيرة اوي في اللهجة الصعيدي واتعلمت منه هو والفنان جمال سليمان وكنت بركز في مشاهدهم عشان اتعلم منهم.
شخصية نادرة شخصية قوية.. هل تفضلين مثل هذه الأدوار؟
شخصية نادرة فعلًا شخصية قوية، وأنا بحب أعمل دور المرأة في الدراما حتى لو كانت بتتعرض لأزمات خلال الأحداث لكنها بترجع لقوتها تاني، وبتعتمد على نفسها، وده شيء مهم لأي ست بتتعرض لأي أزمة.
كيف كان التحضير لأزياء نادرة وشكلها؟
مصممة الملابس غادة وفيق عملت مجهود كبير وواضح عشان تطلع نادرة بالشكل ده، بدأت بإنها سافرت الصعيد عشان تعمل معايشة للواقع هناك وتعرف تختار الأذواق اللي مطلوبة لكل شخصية في العمل وعملت ده فعلًا واهتملت بكل تفصيلة.
يعد مسلسل عملة نادرة التعاون الثالث مع المخرج ماندو العدل؟
فعلًا، احنا قدمنا قبل كده مسلسل لأعلى سعر والسنة اللي فاتت عملنا مسلسل فاتن امل حربي.
وماذا عن العمل معه؟
بنتكلم أنا وهو عن كل تفاصيل العمل بشكل عام لأن العمل الصعيدي بيكون ليه طابع خاص بكل تفصيلة فيه أحداثه، وكمان ماندو يحب مناصرة الستات في أعماله زي ما عمل السنة اللي فاتت في مسلسل فاتن امل حربي، وده اللي بيعمله برضه في عملة نادرة، وأنا وكل طاقم العمل مبسوطين إننا اتعاونا في العمل ده.
اخيرًا.. تتكرر مشاركاتك مع العدل جروب؟
لما بيكون في منتج موفرلنا كل عوامل النجاح سواء كنا بنقدم عمل كوميدي أو أكشن أو غيره وقتها بحس إن في ضهر قوي ساندني، لأنهم لما بحس حتى بحيرة بيفكروا معايا.
