إيمان العاصي في حوارها لـ«الطريق»: الشغل مع محمد رمضان مليان طاقة حلوة.. وكنت بغير بجد على جعفر العمدة
- المخرج محمد سامي ساعدني في التحضير لشخصية دلال
- كنت بغير على جعفر بجد
- أنا زي الفريك محبش شريك
دلال فتح الله، شخصية كيادة رغم براءة ملامحها، تجسد دورها الفنانة إيمان العاصي التي تلعب دور الزوجة الثانية للمعلم جعفر العمدة ابن حي السيدة الزينب، ظهرت الكيمياء بينها وبين محمد رمضان بطل مسلسل جعفر العمدة، الذي يشارك في موسم مسلسلات رمضان.
استطاعت إيمان العاصي أن تخلق لها مكانًا مميزًا وسط الفنانات اللائي يشاركن في هذا الموسم الدسم، لذا التقت جريدة وموقع "الطريق"، بها للحديث عن العمل والتشابه بينها وبين شخصية دلال.
إلى نص الحوار..
كيف حضرتِ لشخصية دلال؟
التحضير كان عن طريق إني عملت تعايش مع الشخصية من قبل ما ابدأ تصوير بشهرين وكان أهم حاجة إني قررت اعملها إن ادي المسلسل كل تركيزي سواء كان وقت التصوير أو وقت مذكرتي للبروفايل كراكتر للشخصية، وده اللي ساعدني فيه المخرج محمد سامي.
هل توقعتِ هذا النجاح؟
الحمدلله المسلسل محقق نجاح لحد أخر حلقة اتعرضت وده لأسباب كتير قوي، وهي إن المسلسل كل يوم فيه أحداث مهمة ومشوقة وكل حلقة فيها ضحك وحزن وتشويق لحدث جديد، كمان مدة عرض الحلقة طويلة من غير مط ولا ملل بالإضافة إلى أداء الزملاء كلهم وتنوع الشخصيات.
وماذا عن محمد رمضان والمخرج محمد سامي؟
طبعًا من عوامل نجاح العمل، هي شعبية محمد رمضان الكبيرة وحب جمهوره له أوي وكل ده مع مخرج زي محمد سامي فالمتوقع طبعًا اللي حصل واللي لسه هيحصل ان شاء الله وأهم من كل ده توفيق ربنا.
علمنا أن الكواليس كانت مليئة بالانسجام بين الأبطال..
جدًا، كواليس مسلسل جعفر العمدة كانت ممتعة جدًا وفي تعاون وحب بين كل طاقم العمل الحمدلله.
الجمهور تعلق بشخصية دلال.. كيف حدث هذا؟
دور دلال الحمدلله اتعلق بيه الجمهور من أول لحظة علشان دلال فيها تناقضات كتير وعندها حكايات برضه مختلفة، هنشوفها حبيبة، وكيادة وكمان مجروحة ولسه اللي جاي كتير.
كيف فعلتِ هذه التوليفة من الحب والكيد والجرح؟
قدرت اعمل التوليفة ديه علشان التعايش اللي حصل بيني وبين دلال، غير إن دلال خدت حب كبير في قلبي بحبها.
ظهرت كيمياء كبيرة بينك وبين محمد رمضان..
الحمدلله وده حصل من أول مشهد وصلنا الكيمياء دي، وعلى فكرة أنا كنت بغير بجد على جعفر واضايق عليه من ثريا ونرجس وعايدة، والعمل معاه في طاقة حلوة قوي ويجبرك متفكريش غير في النجاح.
هل يوجد شبه بين إيمان ودلال؟
لأ، دلال مش شبهي خالص، أنا زي الفريك محبش شريك.
