بعد حفله بلبنان.. محمد يحيى: «نجاح عمرو دياب جاي من إحساسه إنه لسه معملش حاجة»
أعرب الملحن محمد يحيى عن سعادته بنجاح الفنان عمرو دياب في حفله الأخير بلبنان، واستعاد بعض الذكريات معه، مؤكدًا أنه كان السبب في نجاحه عندما صدق موهبته في سن صغير.
نشر محمد يحيى عبر حسابه على "فيسبوك" صورة تجمعه بالفنان عمرو دياب، وعلق: "حفله في لبنان كان أسطوري ومشرف، ومهما هتكلم عن عمرو دياب مش هخلص كلام من بداياتي معاه سنة 2002، لما صدق موهبتي وكان عندي 21 سنة".
وأضاف محمد يحيى: "كان داعما نفسيًا ليا مش هقولكم إحساسه كان إيه وتعبيرات وشه وفرحته لما بيسمع لحن حلو ليا بيبقى طفل، منساش ريحة الحبايب لما سمعها مني في الاستديو، وكان هياخدني بالحضن، وأنا أصلا متردد وكنت خايف أسمعهاله أحسن متعجبوش".
محمد يحيى يكشف سر نجاح عمرو دياب
وتابع: "دندنت الأغنية بصوت واطي جنبه، قالي إيه دي سمعني، موقف مش هقدر أنساه، وفي الآخر طار بالأغنية، وسر نجاح عمرو دياب جاى من إحساسه إنه لسه معملش حاجة، ودايمًا عنده طمع أنه يكمل وأخيرًا البوست ده من قلبي في حب الهضبة الملهم والأخ والصديق".
اقرأ أيضًا: سامو زين عن الذكاء الاصطناعي: «كسبته ومعرفش يوصل لخامة صوتي»
