أحمد حلمي يكشف سر استمرار زواجه من منى زكي لأكثر من 20 عام.. (فيديو)
كشف الفنان أحمد حلمي عن سبب نجاح علاقة زواجه من الفنانة منى زكي لما يقرب من 20 عام، مشيرًا إلى أن كل طرف يجب أن يدرك طبيعة وتكوين الآخر، وضرورة الوصول للغة الثالثة لأن كل منهما يتحدث لغة غير الآخر، إلى جانب حديثه عن علاقته بأولاده الثلاثة، مؤكدًا أنه يرى نفسه أب جيد وعلاقته جيدة بأولاده.
قال أحمد حلمي عن علاقته بزوجته منى زكي: "الناس بتقول أن الحب بيختفي بعد سنين من الجواز، لكن في جملة اتقالت في فيلم واحد الأبطال قال الفرق بين الحب قبل الزواج وبعده، وأكد أن المرحلة الأولى اسمها مرحلة الوقوع في الحب لكن الحب في النهاية استقرار وفيه ناس بتخلط بين المرحلتين وعرفت أن دة حاجة منطقية لأن في البداية الاتنين بيكونوا مجهولين لبعض فبيكون في شغف".
سر نجاح علاقة أحمد حلمي ومنى زكي
وأضاف أحمد حلمي: "أنا متجوز من منى زكي بقالنا أكتر من 20 سنة من 2002، والجواز يعتبر حياة تانية وأهم حاجة فيه الوصول للغة الثالثة، لإن الراجل بيتكلم لغة والست لغة تانية خالص، والمفروض الاتنين يتعلموا لغات بعض، ومهم قوي إن الراجل يقرأ كتالوج الست ويفهمه وهى كمان تعمل كده، ويدركوا إن ربنا خلقهم كده".
وعن أشهر المقولات في العلاقات الزوجية، تابع حلمي: "بيتقال إنه لما مراتك تكون متخانقة في الشغل أو مع صاحبتها وتيجي تحكيلك وانت تقول رأيك وتلبس قبعة الحكيم هي هتضايق، انت مش هتفهم هى اتضايقت ليه لانها عايزة تتسمع وبس وبعد ما تخلص أسألها عن رأيها وبعدها قول رأيك".
وأضاف: "وكمان لما الراجل يكون متضايق مش أول ما يدخل تسأله مالك، سبيه يدخل الكهف بتاعه لوحده شوية وبعدين هو هييجي يحكيلك، وأحيانًا لو حكى لصاحبه أو لمامته بيخليها تحس إنها مش مهمة بس بعد شوية هييجي يحكيلها هى كمان".
علاقة أحمد حلمي بأولادة
أما عن علاقته بأبناءه الثلاثة، قال أحمد حلمي: "أنا شايف نفسي أب كويس إلى حد ما، لإن الأب واجبات ومسئوليات وفيه جزء موجود في كل أب بطريقة طبيعية، والحمد لله أنا علاقتي كويسة بالأولاد".
اقرأ أيضًا: منى زكي: «بستعين بـ أحمد حلمي في الكوميدي وكل دور بغير مدرب التمثيل»
