حورية فرغلي تفتح النار على طليقة حسن شاكوش: «هتشكيكي بالتشهير ومش هتستحملي اللي هيحصل فيكي»
ردت الفنانة حورية فرغلي على ارتباط اسمها مؤخرًا بمطرب المهرجانات حسن شاكوش، وذلك بعدما ذكرت طليقته اسمها في أكثر من حوار أجرته، مشيرًا إلى أنها تسببت في طلاقها من زوجها شاكوش.
نشرت حورية فرغلي فيديو عبر حسابها على إنستجرام، وردت من خلاله على ارتباط اسمها بأزمة حسن شاكوش وطليقته ريم طارق، قائلة: "أنا طالعة أتكلم في موضوع بقاله فترة ومضايقني وكنت ساكتة بس أنا قررت لما يحصلي حاجة زي كده أشهدكم عشان لو غلطانة تقولولي، كنت ساكتة فترة طويلة ومش برد عشان أنا أكبر من كدة بس الموضوع زاد عن حده".
حورية فرغلي توجه رسالة شديدة اللهجة لطليقة حسن شاكوش
وتابعت حورية فرغلي: "أنا من طبيعتي مش بطلع أتكلم بس من كتر ما الموضوع بقى أوفر مش قادرة عايزة أشهدكم، حتى مش حابة أقول الاسم بس هضطر أقول عشان كرامتي وحقي المعنوي، الأستاذة ريم طارق طليقة حسن شاكوش اللي أنا معرفهاش خالص وعمري ما شوفتها إلا في فرحها على السوشيال ميديا، في برنامج بسمة وهبة واتقال اسم حورية وتالت حرف ر والناس سابت كل الأسامي ومسكت في اسمي، ومع ذلك سكت ومتكلمتش إنما يجيلك الجرأة إنك تنزلي وتقولي إن الفنانة حورية فرغلي تكشف عن اسم الفتاة اللي كانت مع شاكوش لغاية هنا وستوب".
وأضافت: "انتي عايزة إيه بظبط، عايزة تجيبي اسم حورية عشان تطلعي تريند، أنا أعرف منين البنت اللي كانت معاه، وأنا مصورة اللي انتي منزلاه وممكن أرفع عليكي قضية، وبرضو بعد ما قولتي كدة أنا سكت، لكن لما تطلعي تقولي أنا معتذرتش لحورية فرغلي، حبيبتي أنا مطلبتش منك تعتذريلي، تعتذريلي على إيه؟ على الفيلم الهندي اللي انتي عاملاه وجايبة اسمي فيه؟".
اقرأ أيضًا: طليقة حسن شاكوش تخرج عن صمتها.. ما علاقة حورية فرغلي؟
وأكدت حورية: "هو أنا أعرفك يا بنتي؟ أنا أكبر من كدة بكتير انتي بس مش واصلك، وإنك تغلطي فيا وأنا مليش علاقة بالموضوع وعمري ما بجيب سيرة حد وفي حالي ومش بحب القيل والقال والكلام في الحاجات الغريبة دي، فـ أنا إنسانة بحب الهدوء وعايشة لوحدي لأني مبحبش الدوشة وعمري ما غلطت في حد وبحترم الناس كلها، وطالعة أرد عليكي وبشهّد الجمهور على اللي بقوله عشان الناس تقولي لو أنا غلطت في أي حاجة".
حورية فرغلي لـ طليقة حسن شاكوش: هشتكيكي بالتشهير بعد كده
واختتمت حورية فرغلي كلامها، وقالت: "الحمد لله تاريخي يشهد عليا إني مع نفسي ومش بتاعة مشاكل وكويسة مع الوسط وبعتبرهم أهلي، وكمية الناس اللي اكتشفت إنها بتحبني وبتدعيلي ربنا يخليهم ليا يا رب، بس في حاجة عايزة أقولها إني بحترم الصغير قبل الكبير لأني اتربيت على كدة وعلموني يعني إيه أخلاق، مش هقولك غير ربنا يهديكي لنفسك وتبطلي تجيبي في سيرتي، لأن المرة الجاية أنا هشتكيكي بالتشهير بيا وصدقيني مش هتستحملي، ومش هتتخيلي هيحصل فيكي إيه، واسم حورية فرغلي متقوليهوش عشان تطلعي تريند".
