بهاء حجازي ..يكتب 21سنة نيللي

21 سنة نيللي

امبارح نيللي كانت بتحتفل بعيد ميلادها الـ 75.. نيللي من اهضم الناس اللي عدوا على شاشة السينما..

نيللي اصلا اسمها نيلّلي آرتين كالفيان.. اتولدت في مصر لاسرة مصرية من اصول ارمينية.. اختها الطفلة المعجزة فيروز..

فيروز لما طقطت مع انور وجدي وكسرت الدنيا.. ابوها قال طيب ويعني انور وجدي بيعمل ايه .. ما انا انتج وانا اولى بالفلوس.. وقالك واذا كان على فيروز.. فانا مش هنتج لفيروز بس انا هنتج لفيروز ونيللي وميرفت.. وعملهم فيلم اسمه عصافير الجنة.. فيلم كفيل يخليك تبيع كليتك وتروح انقاذ الاطفال دول.. بس الفيلم منجحش..

بس نيللي كانت هي نجمة الفيلم.. نيللي مواليد 1949 (اصغر من ابويا بسنة).. والفيلم انتاج 55 .. يعني هي وبتصوره كانت 4 سنين ونص... فانطلقت بقى ... وسبحان الله فيروز تبطل وهي اللي تكمل..

نيللي اتجوزت من حسام الدين مصطفى.. مخرج الحركة الشهير.. وجوازهم كان حديث الوسط الفني كله.. لانها كانت صغيرة وهو كان أكبر منها بـ 23 سنة.. بس هي حبته واتجوزته من ورا اهلها..

وان كان حسام نفسه بيحكي قصة مختلفة ان اهلها كانوا رافضين لاسباب تخصهم.. بس هي قالتلهم انا هتجوز حسام الدين مصطفى لاما بكرا الصبح هروح الدير ومش هتشوفوني تاني.. يعني تترهبن.. فبالتالي مفيش شغل في السينما..

لكن برغم قصة الحب الكبيرة دي.. الجوازة استمرت 3 سنين وانفصلوا.. وبيحكي حسام قصة طلاقهم.. انهم بعد الطلاق هو كان معاه صديقه والسواق بتاعه.. وهي خارجة من البيت وبتلم هدومها.. قالتله حسام.. قالها فيرجين (دلعها).. وراحوا حضنوا بعض وقعدوا يبكوا.. فالسواق قال لصديق حسام: "هو دا طلاقهم ولا جوازهم)..

حسام هيكمل في شغله لكن هيقلب الرأي العام كله لما يعمل زيارة لدولة الاحتلال بعد اتفاقية السلام .. فالدنيا تتقلب عليه بعدها.. لكنه قال ان الزيارة كانت ثقافية ومش سياسية.. والموضوع نام...

زبعدين اتجوزت من مودي الامام ابن المخرج حسن الامام واخو حسين الامام.. وليه شغل بديع هو اللي عامل موسيقى فيلم الهروب مثلا.. لكن برضه الجواز مكملش..

فبعدت عن الفنانين خالص.. واتجوزت من رجل الأعمال المصري خالد بركات وسابت الفن وسافرت لندن واتمنت تكون اسرة وبيت.. لكن تم الطلاق.. خالد بركات اتجوز الفنانة عزة بهاء.. فدايما لما يقدموا عزة بهاء يقولوا ضرة نيللي.. لكن هو مجمعش بينهم.. وعزة بهاء عندها حاجات اهم من المعلومة دي.. زي اني لما كنت صغير قلت ابويا لما اتجوز هخلف بنت اسمها عزة.. علشان تبقى عزة بهاء.. بس اخواتي فضلوا يقولوا عنزة بهاء عنزة بهاء.. فاقلعت عن الفكرة..

رابع جوازة كانت من الخبير السياحي عادل حسني.. واللي برضه اتجوز من الهام شاهين.. بس هي بتعتبر ولاد اختها فيروز ايمن وايمان هما ولادها وهي اللي مربياهم...

من4 سنين كنت شغال في مصراوي.. فعملت تقرير عن نيللي كله حب وفراشات لاني اصلا بحبها.. بس كتبت في التقرير انها بتحتفل بعيد ميلادها الـ 71... فهي قابلت مصور زميلي وقالتله قول لزميلك اللي عمل التقرير يلبس نضارة.. 71 سنة ايه.. اقلب الرقمين انا 17 بس...

فكل سنة وانت طيبة يا نيللي... ونحب نقولها كان فيه فراشة صغنططة.. مفرفشة ومزقططة.. لابسة بلوزة منقطة.. على جونيلة مخططة.. ومش عارف احنا بنعمل في الفراشة كدا ليه ونلبسها الالوان دي ليه..

فكل سنة ونيللي طيبة بعيد ميلادك الـ 21 .. وعقبال سنين كتير..