بسبب إعلانه الأخير.. تامر حسني يرد على تشكيك انتمائه للقضية الفلسطينية

علق النجم تامر حسني على التشكيك في انتمائه للقضية الفلسطينية بسبب إعلانه الأخير، حيث كتب عبر حسابه، "مساء الخير عليكم..بقالي يومين بتابع اللي بيحصل و احتراماً للجميع..انا بوضح حاجه بخصوص إعلان إحدى المنتجات".

اولاً .."أنا على قوة الشركة من سنتين قبل أي أحداث و ده مش أول إعلان ده ثالث إعلان في عقدي ، معلش احياناً الكلام عند بعض الناس بيبقى سهل وتحديداً لما بيكون بدون علم بالعقود و بحيثيات الموضوع كله".

ثانياً .."أنا مضيت على عقد مكتوب فيه إنها شركة مصرية و لها سجل تجاري ضريبي مصري منفصل و البند قدامكم اهوه لصدق كلامي".

ثالثاً .. "والأهم لأي حد بيشكك في انتمائي للقضية الفلسطينية هقوله أنا من 20 سنة وأنا في ضهر القضية و مش كلام وأغاني بس لاااااا ..أنا روحت بنفسي معبر رفح أثناء الضرب لمساندة أهالينا هناك بأكبر حملة معتقدش في حد هيخاطر بحياته و يروح بنفسه معبر رفح اثناء الضرب مجاملة مثلاً ".

اخيراً …"أنا لما قررت أكون الوجه الإعلاني للشركة من سنتين لأنه منتج مصري كل المصريين بيحبوه و البطاطس من الفلاحة المصرية و بيتباع في مصر بس و اتربينا عليه و الاهم أن الشخص البسيط يقدر يشتريه في ظل ظروفنا الاقتصادية و اظن ده واضح في الاعلان .. ده كان شعوري الشخصي اتجاه الحملة وأنا بمضيها من سنتين عشان كده كان واجب عليا التوضيح للجميع و للي مش واصلاله الصورة بكل احترام .. و شكراً لكل اللي ردوا عني و هما مغمضين حقيقي انتوا نعمة كبيرة من ربنا ألف شكر و رمضان كريم على الجميع".