تعليق صادم من المطرب عصام صاصا بعد حادث الدائري.. ماذا قال؟
حرص مؤدي المهرجانات عصام صاصا على توجيه رسالة خاصة لجمهوره ومتابعيه، بعدما تسبب في وفاة شخص بحادث سير على الطريق الدائري خلال الفترة الماضية، وإثبات تعاطيه المواد المخدرة أثناء قيادته السيارة.
أول رد من عصام صاصا بعد أزمته الأخيرة
وأعرب المطرب عصام صاصا خلال منشور له، عبر حسابه الشخصي على موقع الفيسبوك، وكتب: "بسم الله الرحمن الرحيم.. ربنا وحده يعلم أنا بكتب الكلام دا وأنا عامل إزاى وفيا إيه.. أنا بقالي اكتر من شهر قاعد من غير شغل ومعنديش أي حاجه أعملها غير إني قاعد وما باليد حيله ومستني قضاء ربنا سبحانه وتعالى ومحدش هيفهم أو هيحس بالموضوع غيري".
وتابع: "وأنا مطلعتش اتكلمت وعدت وزدت في الموضوع كتير ومحدش شافني حته بفيديو قولت أي كلمة خالص، لكن أنا عندي شغلي وعندي عقود والتزامات لما أعملها وأخلصها يا أما هدخل في قصه تانيه أنا مش قدها وشرط جزائي.. أنا هنزل شغلي وهشتغل لأني مش بإيدي أي حاجة غير إني أعمل كدة".
وأردف عصام صاصا، وقال: "أنا عندي أمي وعندي أخويا وعندي مراتي وابني وفرقة فيها أكتر من 35 شخص في رقبتي أنا شاب لسه ببداء حياتي ولسه بقول يارب.. مصاريف البيت والاقساط والحاجات دي كلها اللي إنتوا متعرفوش عنها حاجة مين اللي هيدفعها.. أنا طالع اتكلم لان ما باليد حيله غير انكم لازم تفهموا ان كل اللي بتسمعوا مش صح الفلوس والقصور والعربيات كل ده مش صح.. وحال الناس اللي شاغلين معايا كل دول حالهم واقف بسببي أنا كل دول ليهم بيوت وعيال ودنيا تانية خالص".
واختتم عصام صاصا رسالته، قائلا: "أنا عارف ومتاكد إن ربنا مش هيورينا الشر ومش هيوريني أي حاجة وحشة.. ده ابتلاء من عند ربنا سبحانه وتعالى، وأنا راضي بكل حاجة ومش هقول غير الحمدلله على كل شئ والحمدلله واللي ربنا كاتبهولي هشوفوا.. سواء خير أو شر، محتاج من كل الناس اللي بتحبني تدعيلي من قلبها بجد، أنا عمري ما كنت شخص مؤذي وعمري ما كنت شخص وحش مع حد.. ربنا كبير.. وحشتوني أوي يا أحلى جمهور في الدنيا".
