”رجعي الفلوس”.. الهجوم على حلا شيحة عرض مستمر.. وتعليقات نارية من نجوم الفن

تعرضت الفنانة حلا شيحة لهجوم عنيف من نجوم الفن، بجانب الجمهور بعد مهاجمتها ومنشورها المسئ للفنان تامر حسني وغضبها من عرض آخر أعمالها وأول فيلم سينمائي لها عقب عودتها من الاعتزال.

حيث علق المخرج محمد جمال العدل عبر حسابه بموقع فيسبوك على بوست حلال شيحة قائلًا: ياريت بس لما تطلقي ماترجعيش تقولي عايزة أمثل تاني يا أستاذة حلا، وفي الوقت نفسه كتب الشاعر خالد تاج الدين عبر صفحته الرسمية بموقع التدوينات الصغيرة تويتر: ربنا يثبتك وتحلي عننا بقى ما هو مترجعيش تعملي شوية فلوس زي الفل.. وبعد كده تشتمي الفن وياريت تتخلصي من كل الفلوس اللي قبضتيها في السنتين اللي رجعتي مثلتي فيهم علينا.

كما كتب السيناريست محمد سليمان عبدالمالك عبر صفحته: ليه التوبة على إنستجرام؟ هي توبة قدام ربنا ولا قدام الناس ولم تتوقع الهجوم الناري عليها من نجوم الفن، وكتب الفنان خالد سرحان: اللي مايحترمش الفن يرجع الفلوس والفلل اللي كسبها من الفن.

ومن جانبها مخرجة فيلم "مش أنا" كتبت تعليق ناري أثار ضجة كبيرة على صفحتها قائلة: أستاذ معز أنا سارة وفيق مخرجة فيلم مش أنا.. قرأت بوست حضرتك اللي بتوضح فيه انك فاهم قصد حلا عن بعض اللقطات اللي كان المفروض نراعيها. . خلينا نتكلم بالحق بعد اذن حضرتك احنا نشيل مشاهد ليه و بأي حق بعد ما صورت و اخدت اجرها كامل ؟

وتابعت: واحنا مالنا انك اتجوزتها !!!! انت اتجوزتها فنانة و بتصور الفيلم دا و دي حاجه بينك و بينها احنا مالنا و كمان بتقول كنت هتاخد اجراء ..إجراء ايه اللي تاخده انت ملكش اي حق تاخد أي إجراء المفروض تشكرنا اننا مخدناش إجراء قانوني ضد مراتك اللي امتنعت عن تسجيل صوتها لدوبلاچ الفيلم وعن تصوير افيش الفيلم اللي مدفوع فيه ملايين انت متعملش حاجه غير انك تشكرنا.

وأضافت سارة وفيق: لأننا شيلنا كل المشاهد اللي هي ماكنتش عايزاها وممكن ابعتهالك تشوفها عشان تعرف بس ازاي انا و المنتج و الفنان تامرحسني فتحنا الفيلم و عيدنا المونتاچ تاني على حساب الفنان تامرحسني مادياً عشان يرضي حلا مع انها مشاهد من وجهة نظري طبيعية و كوميدية و رومانسية راقيه لأن دي طبيعة أفلام تامر ومع ذلك شال كل المشاهد دي و احترم وجهة نظرها.

واستكملت كلامها: فيما يخص الكليب بقي هو حضرتك كنت فين من 21 يوم من ساعه ما الفيلم نزل ما هو الكليب في الفيلم ومصر كلها تقريباً شافت الفيلم و محقق اعلى إيرادات كنت فين حضرتك و هي كانت فين ؟؟؟ ما هو الفيلم كله على بعضه هينزل كمان في التلفزيونات بالكليب اللي جواه و بعدين دا كليب رومانسي و المراعاه من وجهة نظرك هي ضرر من وجهة نظر الإنتاج و دي مصاريف كبيره اوي.

وكتب الفنان أحمد الشامي مهاجمًا حلا شيحة قائلًا: والله أنا مبسوط من كل ردود إن الناس فاهمة إن كل ده أكل عيش، وإن لو الشهرة فتنة وهي مقتنعة كانت هي بنفسها قفلت كل السوشيال ميديا ووقفت كلام مع صحافة، وكتب المنتج محمد العدل: اللي عملتيه شايفاه حرام، هتصرفي فلوس حرام؟، رجعي الفلوس، وأضاف: عفوا، أفخر بانتمائي للفن والفنانين.

وتابع المنتج محمد العدل قائلًا: يقولون ما فعلته خطيئة ولكن.. ما فعلته ليست بخطيئة.. هي حرة نفسها.. صحيح ماحدش أجبرها على تصوير ما ترفضه، لكن حريتها ملكها.. لكن ما قالته هو الخطيئة.. اتهمتنا واتهمت أختها وأبوها في دينهم.. وجوزها المنتج برضو اللي بيشجع الفنانين على الشهرة.. طيب سؤال.. لو الكليب اتعرض في شهر جمادي الأول مش ذو الحجة.. كان يمشي معاكي.

يذكر أن الفنانة حلا شيحة كانت كتبت عبر صفحتها: أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة أيام مباركة وخصوصاً بعد آخر بوست نزلته ووضحت فيه أنا إيه.. اتفاجئت أكتر خصوصا ًبعد وعد تامر حسني ليا وتأكيده إنه حيحترم رغبتي وبعض الطلبات اللي طلبتها منه بكل احترام وود الصيف اللي فات وأكدلي إنه حيحترم رغبتي.

وتابعت: احنا يمكن نجحنا بمقايس الدنيا بس صدقوني بمقياس ربنا إحنا لم ولن ننجح، أنا عارفة ومتأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح.. بتكلم من قلبي الكليب ده ميرضيش ربنا وأنا عيطت لأني شفت نفسي في المشاهد دي، دي كانت زلة نتيجة ظروف مريت بيها وكلنا بنغلط ولازم نغلط علشان احنا بشر بس المصيبة إننا بنغفل وبننسى.

اقرأ أيضًا: منة فضالي تتحدث عن حجاب حلا شيحة بعد أزمتها مع تامر حسني

وأضافت في تعليقها: أنا مش حتكسف من حد أنا تبت من المشاهد دي وهي لا تصح وأنا غلطت وبصلح وأهم حاجة إن ربنا يرضى عني لأن في الآخر ده اللي حينفعنا مش الشهرة ولا النجاح لا هو مش نجاح أصلا، علشان النجاح الحقيقي حاجة تانية خالص إحنا أغلبنا ناسينها إلا القليلين، الفن لو بيخلينا نبعد عن منهج ربنا ومنبقاش قدوة لولادنا يبقى باطل وميبقاش فن.

وقالت أيضًا: إحنا كلنا عندنا امتحان في الدنيا دي وحابة أفكرك بالفيديو ده يا تامر اللي قولت فيه أنا مش بتمنى أموت وأنا مطرب أنا دايما خايف من كده، كلام أكيد قولته في لحظة صدق جواك وجوانا كلنا.. كلنا بنغلط بس المهم في الآخر نتدارك الغلط و نصلح، {إِلَّا مَن تَابَ وَءَامَنَ وَعَمِلَ عَمَلا صَـٰلِحا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورا رَّحِیما}.