مرتضى منصور: «أي حد هيقولي الصفقات أخبارها إيه.. هقوله انت أمك مالها»
فتح مرتضى منصور رئيس نادي الزمالك النار على جماهير القلعة البيضاء، بسبب الصفقات التي أبرمها لتدعيم صفوف الفريق الأول لكرة القدم خلال الانتقالات الصيفية الجارية.
وقال مرتضى منصور في تصريحات عبر قناة "الزمالك": "اللي بيكلمني عن الصفقات من الجماهير، حد بعت سألني فين الصفقات الفاشلة، بقوله يا ابني عيب خليك مؤدب ومحترم، أنت عارف احنا جبنا مين، انت ملكش دعوة، أنت مشجع محترم من الجمهور المحترم أنت ماتدخلش أوضة العمليات والدكتور بيعمل عملية لأخوك أنت ليك إن العملية تنجح انت مالك؟".
وحذر رئيس الزمالك: "أي حد هيقولي الصفقات أخبارها إيه، هقوله انت أمك مالها"، وفقًا لما ورد على لسان مرتضى منصور.
وتابع: "هو إبراهيما ناداي اللي مكسر الدنيا مش عاجبك، وزكريا الوردي اللي بيقوم بدور ساسي وطارق حامد من غير ما ياخد إنذار أو يطرد، وأحمد أيمن منصور لاعب سوبر وبيلعب في أكثر من مركز وجاي مجانًا".
وردًا على سؤال من يختار صفقات الزمالك، رد موجهًا حديثه للجماهير: "عايزين تدخلوا أنتم! أنا رئيس النادي المفروض مين اللي يتدخل، واحنا بنعرض على فيريرا الصفقات قبل التعاقد معاها".
وواصل: "يا جماهير الصفقات اللي أنتم بتحلموا بيها وأكتر، بس من غير ما تفرضوا رأيكو عليا، كل أعضاء مجلس الإدارة لا يعلموا من هم الصفقات، والملعب هو الفاصل بينا".
اقرأ أيضًا: وكيل سواريش يكشف المستور وراء الشرط الجزائي في عقد المدرب مع الأهلي
واختتم رئيس الزمالك تصريحاته: "في كل مركز هيكون في لاعب أول وثاني للطوارئ، وسيبوا فيريرا يختار ومعاه أمير، وبلاش كلام عن الصفقات، والبرتغالي هو اللي اختار زكريا الوردي".