محكمة الأسرة اليوم 2020| زوجة تصرخ: أنا من حقي أدلع

" أولا أنا من حقي أدلع، أنا أصلا متجوزة عشان أدلع وأحس إني متجوزة، أومال أروح أغلط يعني"، هكذا بررت زوجة دعواها للتفريق بينها وبين زوجها أمام محكمة الأسرة بالتجمع الخامس.

وقالت الزوجة فى دعواها أمام محكمة الأسرة بالتجمع الخامس: "اتجوزت من ٣ سنين جواز تقليدي مفيهوش علاقة حب او ارتباط، عشت طول مدة جوازنا فى كبت حقيقي مش قادرة اتنفس منه، ممنوع أضحك ممنوع أهزر، ممنوع نخرج سوا، ممنوع أمسك إيد جوزى فى الشارع، ممنوع نحضر فرح أو مناسبة سوا، ممنوع حتى أقول إنه جوزي" .

وتابعت الزوجة فى دعواها أمام محكمة الأسرة بالتجمع الخامس: "جوزي حتى رافض يعاملني زي مابيعامل أصحابه، واللي بيقضي معاهم وقته كله، حسيت مع الوقت إنه بيتكبر عليا، ورافض يظهر معايا فى الأماكن العامة والمناسبات، وحجته دايما إني بدلع، وهو مش فاضي لدلع الستات، اتخانقت معاه كتير ودايما يحسسني إن قليلة وعار عليه، ومجرد وجوده نعمة المفروض أشكر ربنا عليها".

وواصلت الزوجة بدعواها أمام محكمة الأسرة بالتجمع الخامس: "أنا قررت مش هكمل حياتي معاه، دي حياة كئيبة وأنا مش هعرف استحمل بالطريقة دي، أنا بسبب تصرفاته قضيت وقت فى بيت أهلي أكتر من بيته".

ولاتزال الدعوى منظورة إلى الآن تنتظر الحكم.