مرتضى منصور يهدد وزير الرياضة: كنت موظف عندي.. وهفضح سرك (فيديو)

هدد مرتضى منصور، رئيس الزمالك المعزول، وزير الشباب والرياضة الدكتور أشرف صبحي، وذلك بعد قراره بحل مجلس إدارة نادي الزمالك، وتعيين مجلس مؤقت لإدارة أمور النادي برئاسة المستشار أحمد بكري.

وقال منصور في فيديو تم بثه عبر "يوتيوب": "سؤالي للوزير هو حضرتك مسمعتش عن حاجة اسمها التدخل الحكومي؟ وإن حضرتك إللي شكلت اللجنة، وهو ده من اختصاصك، لأ، انت مالك بلجنة الكرة وتكلم فاروق جعفر، هو ده من اختصاصك".

وأضاف: "إيه انتخابات مبكرة إللي انت بتدعي ليها، أنا راجل وطني محترم، ولكن مفيش مشكلة".

وتابع: "أنا هأكشف سرك في الفيديو القادم، مين اللي سلطك تعمل كده، ومين إللي أقنعك إنك تعمل كده في نادي الزمالك وتقعد نتكلم مع اللجان".

وأكمل: "يا وزير الرياضة انت دمرت نادي الزمالك، والوزير إللي قبلك دمر الزمالك بردو، انت كنت في نادي الزمالك قبل شهر ونصف بتفتتح انشاءات والناس كلها هتسمع إللي أنت قلته عن المجلس المحترم وقتها ولكن ده في الفيديو القادم".

واستطرد: "كان في ميزانية في شهر ستة إللي فات، وكان فيها فائض 50 مليون جنيه، وحضرتك اعتمدت الميزانية، وإزاي ده حصل تعتمد ميزانية فيها فائض 50 مليون جنيه، ويطلع إني مديون وعلي مليار ونص بعدها".

اقرأ أيضًا: مجلس إدارة الأهلي يوجه ضربة جديدة للزمالك.. اعرف تفاصيل

وتابع: "بلاش دي إزاي ثلاثة رؤساء وزراء ييجوا نادي الزمالك ويفتتحوا مشروعات طيب ما كان حد فيهم قال هات اللي عليك للدولة الأول".

وأكمل: "هو نادي الزمالك تركة ليكم؟ ولا علشان أنا اتكلمت عن نادي القرن، ولا نتصالح مع قطر؟".

وتابع: "ياوزير الرياضة متنساش إنك كنت موظف عندي، وكنت مديك وضعك، وجيت وكنت عاوز تمسك العلاقت العامة، وتنزل في انتخابات النادي".

أحمد بكري بيهددني بأخواته

وتطرق منصور للحديث عن المستشار أحمد بكري، رئيس اللجنة المؤقتة التي تدير نادي الزمالك، قائلًا: "أحمد بكري بيهددنا بأخوه محمود اللواء إللي في أمن الجيزة، وبأخوه حمدي إللي في مجلس الدولة، وعاملين أمن على النادي علشان يمنعونا من دخول النادي".

وأضاف: "حضرتك متصور في مكتبي، الكراسي إللي انتوا قاعدين عليها دي أنا اللي جايبها من مالي الخاص، والنجفة والستاير، والتلاجة، وكل حاجة في مكتبي جايبها على حسابي، وبعدين إزاي يا أستاذ أحمد بكري تكسر باب مكتبي، وانا هأقول أستاذ، علشان كلمة مستشار دي كلمة كبيرة".

وتابع: " حضرتك استأذنتيني، طيب أنا متعلقاتي جوه مكتبي، أعمل فيك محضر في النيابة ومجلس القضاء والتفتيش؟ وبعدين حضرتك رجعت كل الناس بتوع ممدوح عباس".

وأكمل: "أنا قلت قبل كده مش هأطعن في انتخابات مجلس النواب، لأ أنا هأطعن، لان مينفعش يبقى ليا 18 الف صوت مع 22 الف صوت كنت نجحت ب40 الف صوت، لأ هأطعن طبعًا، أنا كنت عمال أحسس وأطبطب، لأ أنا هأطعن بقه".

رسالة لجمهور الزمالك

ووجه مرتضى منصور رسالة لجمهور الزمالك قائلًا: "بأقول لجمهور الزمالك انتوا صدقتوني لما قلتلكم مفيش رموز في النادي، انتوا الرموز وكلهم هاموش، وبيقولوا احنا في ضهر النادي، وكل واحد ماسك خنجر وبيطعن في النادي، وناس كلها بتدور على مصلحتها ومحدش قالهم عيب وإزاي ده يحصل في نادي الزمالك".