”بمبدأ العفو عند المقدرة”.. تفاصيل تنازل نشوى مصطفى عن قضية التحرش بابنتها
فاجأت الفنانة نشوى مصطفى جمهورها بتفاصيل جديدة في قضية التحرش بابنتها بأحد المناطق بالهرم، إذ كشفت أنها تنازلت عن اتهامها للمتهمين في واقعة التحرش بابنتها، مشيره أنها تصالحت معهم في النيابة العامة.
وكتبت الفنانة نشوى مصطفى عبر صفحتها على موقع التواصل الاجتماعي "فيس بوك" إنها تنازلت عن المحضر وتضمن المنشور: "يوم طويل فى نهاية اليوم أحب أقدم كل الشكر والامتنان لمعالى النائب العام وللفاضل رئيس نيابة الهرم وللفاضل وكيل نيابة الهرم، بلدنا عظيمة بشرفائها وشكرا جزيلا وزارة الداخلية، احنا مسنودين عليكم والله كتر ألف خيركم.
أضافت: "بالمناسبة الطرق الجديدة والكاميرات اللي فى كل مكان على الطرق والملصق الإلكترونى اكتشفت بالبرهان أنهم مش بس علشان يرصدوا مخالفات السرعة".
وتابعت نشوى: "الملصق والكاميرات حماية لينا من أي حد ممكن يبلطج، فيه كاميرات بتسجل كل التفاصيل ومفيش أي فرصة لأي بلطجة، بسبب العظمة اللي الطرق بقت عليها الحمد لله تم القبض على العربية باللي كانو فيها فى أقل من أربع ساعات".
واستكملت نشوى:"للأسف كلهم سنهم صغير، الهدف اتحقق انهم هما وغيرهم عرفوا إن مصر اختلفت وكله متسجل وأن عندنا عنين صاحية بتحمينا ومحدش فوق القانون، يمكن آخر سطر ده يزعل بعض الناس اللي طلبو مني استمر في القضية".
وقالت الفنانة نشوى مصطفى "حرصا على أمهات وأسر المتهمين وانهيارهم بأن ولادهم يتسجنوا أنا وابتغاء مرضاة الله تنازلت عن القضية عملاً بمبدأ العفو عند المقدرة".
ودعت للمتهمين قائلة: "ربنا يهديهم، واللي طلبتوا من أهاليهم وهما بيعتذروا لبنتى أنهم يربوا عيالهم ويفهموهم معنى الرجولة، وإن أقل عقوبة للمتحرش باللفظ أو الإشارات الخادشة للحياة هى خمس سنوات طبقاً لقانون التحرش اللي أمر بتعديله سيادة الرئيس حفاظاً على حق بناتنا".
وواصلت نشوى كلامها "حاجة تانية مهمة مكنتش اعرفها، أنا بالمناسبة معملتش محضر، أنا بس كتبت بوست هنا، واللي اتحرك بالنيابة عنى كمواطنة مصرية إدارة الرصد والبيان والتوجيه بمكتب النائب العام، ودي إدارة موجودة مخصوص لمتابعة السوشيال ميديا وبيهتموا بأى مشكلة يكتبها اي مواطن وليهم ارقام تليفون نقدر نتواصل معاهم وهما اللي بيقوموا باخطار النيابات المختصة نيابة عن اى مراطن تعرض لمشكلة".
واختتمت نشوى:"على فكرة انا اتنازلت عن الجزء اللي يخصنا لكن حق الدولة مش من حقى اتنازل عنه وهما عندهم مخالفات كتير، وتحيا مصر من كل قلبي".
وكانت الفنانة نشوى مصطفى قد أعلنت عن تعرض ابنتها للتحرش، قائلة "النهارده بنتى اتعرضت للتحرش من العربية دى وفضل يزنقوا عليها واترعبت وهى سايقة على كوبرى ناحية الهرم المنصورية وكلمتنى وهى مفزوعة قلت لها حاولى تصوريهم وعملو لها اشارات سافلة زي ماهو فى الصورة كده".
وأضافت: "الحمد لله ربنا ستر وبنتى موقعتش من على الكوبرى وهى مرعوبة من حجم العربية اللورى اللي بترهبها — حسبى الله ونعم الوكيل فيهم".
وأخلت النيابة سبيل المتهمين من ديوان قسم شرطة الهرم ما لم يكونوا مطلوبين على ذمة قضايا أخرى، ويجرى الكشف عليهم جنائيا وفحص تراخيص السيارة التي كانوا يستقلونها نفاذا لقرار النيابة العامة.
اقرأ أيضًا| بفستان زفاف في أحضان صديقها.. ابنة عمرو دياب تثير الجدل (صور)
وكانت باشرت النيابة العامة التحقيقات في واقعة التحرش بابنة الفنانة نشوى مصطفى، بإيحاءات خادشة في منطقة الهرم بالجيزة
وكشفت الأجهزة الأمنية بمديرية أمن الجيزة، تفاصيل واقعة التحرش بابنة الفنانة نشوى مصطفى في الهرم
وتمكنت الأجهزة الأمنية في الجيزة، من ضبط المتهمين في واقعة تعرض ابنة الفنانة نشوى مصطفى للمضايقة من قبل أشخاص يستقلون سيارة نقل أعلى كوبري المنصورية الهرم.
