«القرآن بيقولي لازم التزم».. من هي زيزي عادل التي اعتزلت الغناء؟
تصدرت الفنانة زيزي عادل "التريند" بمحرك البحث الأشهر جوجل خلال الساعات القليلة الماضية، بعد اعتزالها الغناء من خلال فيديو نشرته -عبر صفحتها الرسمية- بموقع التواصل الاجتماعي لتبادل الصور والفيديوهات انستجرام.
من هي زيزي عادل التي اعتزلت الغناء؟
ولدت زيزي عادل عام 1987 في الكويت وتخرجت في معهد الموسيقى العربية، ثم بدأت مسيرتها الفنية من خلال برنامج المسابقات الشهير "ستار أكاديمي" في موسمه الثاني، وانضمت إلى شركة روتانا وأصدرت أول ألبوماتها التي تحمل اسم "واحدة طيبة"، ولها أيضًا 3 أشقاء.
ويشار إلى أنها بدأت الغناء للمرة الأولى من خلال المدرسة، وحصلت على جائزة أفضل صوت للمدارس، حيث غنت أغنية "عيد الأم" وكانت وقتها في العاشرة من عمرها، ويعد رصيدها الفني 12 ألبوما غنائيا.
وقالت زيزي عادل في الفيديو الذي أعلنت به الاعتزال:
"أنا طالعة أقول خبر مهم جدا أخدته في حياتي، ويمكن يكون أهم خبر خدته في حياتي، هو قرار الاعتزال، قررت أسيب المهنة اللي أنا بشتغلها.. يمكن القرار ده ما أخدتهوش امبارح يعني، أخدته من فترة كبيرة، أنا مطلعتش أقولكم الخبر ده".
اعتزال زيزي عادل
وتابعت زيزي عادل حديثها: "لإني كنت حابة أتكلم مع نفسي ومع الناس القريبة مني جدا، والناس دي دعمتني جدا لما قولتلهم القرار ده، وشجعوني جدا إني أعمل كده، أنا ببعد عن أكتر حاجة من أكتر من المغريات في الدنيا، اللي هي الشهرة".
وأضافت زيزي عادل: "وهبعد عن الشهرة والأضواء والفنانين، اللي هي الناس بتقرب منها.. الفترة اللي فاتت قربت من ربنا جدا، ولقيت القرآن بيقولي إني لازم أكون ملتزمة، لازم أكون على قد ما أقدر أكون ملتزمة، ويمكن تكون مستغربين، إني طالعة بشعري ومش محجبة، ده لإن ربنا لسه ما أنعمش عليه بخطوة الحجاب".
واستكملت كلامها: "وبدعي ربنا إني ألبس الحجاب، وكل حاجة بتيجي خطوة خطوة، مفيش حاجة بتيجي مرة واحدة، فأنا خدت خطوة وإن شاء الله تيجي الخطوة اللي بعدها.. عايز أقولكم كمان إني بالنسبة للفن هو مصدر دخلي، أنا سبت حاجة بعيش منها، ولكن أنا سبت ده وعارفة إن ربنا هيرزقني، ربنا مبينساش حد، فسايبه ده على ربنا، ومعنديش مشكلة، بالعكس راضية جدا على القرار اللي أنا أخدته ومبسوطة بيه جدا".
اقرأ أيضًا: اليوم.. انتصار ضيفة بسمة وهبة في «العرافة 2»
واختتمت قائلة: "وحابه اللي جاي من حياتي، ويمكن بعد ما أخدت القرار ده، تعرضت لمواقف اختبار من ربنا، ولما سألت أهل العلم أفتوني بكده، وكنت محطوطة تحت ضغط أوافق أو ما أوافقش، والاختبار كان بالنسبالي صعب شوية، خصوصا إن البني آدم ضعيف، ويمكن العرض اللي جالي مجاليش وأنا بمارس المهنة، والحمد لله قدرت أقف بدعم من الناس اللي حواليا".
