صنع نفسه من الصفر.. نجوم الفن يدعمون محمد صلاح بعد خسارة دوري الأبطال

حرص العديد من نجوم الفن على تقديم الدعم للنجم المصري محمد صلاح لاعب ليفربول الإنجليزي بعد خسارة فريقه أمام ريال مدريد في نهائي دوري أبطال أوروبا.

محمد هنيدي

نشر النجم محمد هنيدي، صورة محمد صلاح عبر حسابه الشخصي بموقع التواصل الاجتماعي فيسبوك، وعلق قائلا: "عارف لما بتبقى بتلعب بلاعب في البلاي ستشين وفجأة تلاقيك بتنافسه أو اللاعب بعد ما اعتزل بيحلل أداءك في التلفزيون وبيوصفك بالأفضل في منطقتك في العالم عشان كدة بقى عايز أقول حاجة.. بقالي فترة بشوف "بعض" الشباب اللي بيحاول يسخر أو يقلل من صلاح .. يمكن يكونوا مابيحبوش صلاح أو بيشجعوا فرق منافسه".

وتابع: "من حقك ماتحبش صلاح وحقك تحب فريق منافس وتشجعه.. بس الفكرة ليه تقلل أو تكره واحد قدر يعمل اللي ملايين كانوا بيشوفوه مستحيل؟.. صلاح اللي كان بيسافر بالقطار كل يوم وينام في النادي ع الأرض وبدون واسطة قدر يصنع نفسه من الصفر.. لغاية لما وصل أنه بقى ينافس على الأفضل في العالم.. صلاح زينا وشبهنا.. ماتولدش في بقه معلقه دهب .. قدر يكون مثال لأي واحد بيتعب وشايف أنه حلمه وهدفه مستحيل يتحقق.. صلاح مثال لأي شخص مجتهد وبيمر بظروف صعبة وحياة صعبة.. مثال أنك تقدر مش بس تكون الأفضل في بلدك.. تكون الأفضل في العالم.. الفكرة مش في الشخص.. الفكرة في الفكرة نفسها.. أن يكون عندنا شخص وأشخاص طبعا في مجالات كتير تانيه زيه.. قدروا يحققوا اللي أنت وإحنا كنا شايفينه مستحيل.. فالحب والتقدير لصلاح.. مش حب لشخص .. حب لفكرة ونجاح وهاردلك لصلاح".

محمد أنور

وكتب الفنان محمد أنور، عن محمد صلاح: "بدل ماتفرحو بفوز ريال مدريد وتفرحو بخسارة محمد صلاح، أفرحو أن فيه واحد مصري علي سقف طموحنا وخلانا زعلانين أنه خسر نهائي دوري أبطال أوروبا في الوقت اللي لما كان واحد مصري بيحترف في الدوري السلوفاكي كنا بنفرح".

وأضاف: "واحد مصري بقي أهم وأفضل لاعب في الدوري الإنجليزي في آخر 5 سنين ومن أفضل 5 لاعبين في كوكب الأرض والناس في العالم كله بتغنيله وبتهتف باسمه واسم مصر، واحد مصري خلي شباب كتير أوي يتمسك بالأمل ويشوف أن مفيش حاجه مستحيله، إحنا زعلنا النهاردة علي صلاح هو زعلنا علي نفسنا بالظبط لأننا كنا عاوزين سقف طموحه وطموحنا يعلي أكتر من كده ويبقي ملوش حدود، وازعلو علي كل سنة بتضيع من عمر صلاح في الملاعب من غير مايحقق كل حاجه لأننا من بعده ماحدش هيعيشنا اللحظات دي تاني وهنرجع نتفرج علي الناس دي في البلاي ستيشن بس".

اقرأ أيضا: على هامش كان.. تكريم الناقد طارق الشناوي بمهرجان فاتن حمامه.. صور

مجدي الهواري

كما نشر المخرج مجدي الهواري، صورة لمحمد صلاح عقب خسارة فريقه، عبر حسابه الشخصي بموقع تبادل الصور والفيديوهات الشهير إنستجرام، وعلق قائلا: "بنحبك يا أبو صلاح، أرفع رأسك".