تامر حسني يعلق على استعانة «طلاب» بأغانيه في عرض مشروعات تخرجهم
أعرب النجم تامر حسني، عن امتنانه وسعادته الكبيرة، لاستعانة بعض الطلاب الخريجين بأغنية من أعماله الفنية، من أجل بث الحماس عند عرض مشروعات تخرجهم، لافتًا إلى أنه عند أدائه لهذه الأغاني كان يود أن يشعر الجمهور بها ويتفاعل معها، ولا تقتصر على سماعها فقط.
وشارك الفنان تامر حسني، مع متابعيه مقطع فيديو لعدد من الشباب أثناء مناقشة مشروع تخرجهم، عبر صفحته الرسمية على موقع التواصل الاجتماعي «إنستجرام».
وعلق عليها قائلًا: «فرحة عمري لما شباب عظيم من شباب مصر الواعد يستوحي مشروع تخرجه أو يقتدي بأغنية ليا زي الموضوع فيك أو مش تمثال أو قد التحدي.. والله والله وأنا بعمل الأغاني دي كانت دي نيتي أنها تتحس ويتعمل بيها مش تتسمع بس والحمدلله اللي طلبته من ربنا حصل عشان اللي بيطلع من القلب بيوصل للقلب.. مبروك شباب مصر العظيم.. يا رب حياة جديدة كلها خير ونجاح وطموح لا ينقطع.. ربنا يفرح أهاليكم بيكم أنتوا أملنا وأنتوا النماذج المشرفة الحقيقية».
اقرأ أيضًا: «التذاكر تصل إلى 800 جنيه».. تفاصيل حفل علي الحجار في المنارة
وأضاف تامر حسني: «الحقيقة اتطلب مني كلمة أقولها للشباب اللي بيتخرجوا بس أنا كدا كدا كنت هكتب لكل شبابنا مش اللي بيتخرج بس بكتب لينا كلنا.. أكتروا وخلوا أيديكم في أيد بعض.. هفضل أقولها مفيش حل غير أنك تنجح لما بتنجح كل الناس بتقدرك واللي مكانش فاهمك ومصدقك بيصدقك وبيحترمك.. لما بتنجح بتبقى قوي ومرغوب فيك».
وتابع «حسني»: «لما بتنجح ربنا بيحبك وبيستخدمك عشان تنفع غيرك.. يا شباب يا جميل متبخلوش على بعض بالنصيحة والكلمة الطيبة وفعل الخير.. أي فكر شرير مهما كان كتير لازم يلاقي قصاده فكر خير أكبر و أكتر عشان ننهض ببلدنا ونسلمها لأولادنا أحسن من ما كانت في زمنا هي دي رسالتنا كبشر وكل حد فينا مادام بيصحى من النوم بيلاقي نفسه لسه عايش لازم يعرف أنه لسه مطلوب منه مهام في الدنيا لازم يعملها و يفرح أن ربنا مديله وقت وعمر يحقق فيه ومهما كانت الصعاب أنت لازم تبقى بطل قصة حياتك».
واختتم تامر حسني، حديثه قائلًا: «عمركم سمعتوا عن بطل معندوش معاناة!!؟.. مستحيل.. المعاناة دي اللي هتصنع منك راجل قد المسؤولية وهتبقى بسببها بطل في قصة حياتك ومش عيب تبدأ من الصفر ياما ناس بدأت من تحت الصفر ووصلوا لأكتر من أحلامهم أنتوا كمان هتوصلوا.. ثقوا في نفسكوا وخلوا يقينكم بالله أقوى شيء.. صراع الدنيا صراع يقيني.. صدق نفسك أنت تقدر وأنتي تقدري.. يعلم ربنا أنا بحبكوا قد أيه ونفسي أشوف شباب الوطن كله ناجح وفرحان ومفرح أهله مبروك يا أمل مصر».
اقرأ أيضا: تامر حسني يدعم مرضى ضمور العضلات ويقترح فكرة لعلاج غير المقتدرين.. فيديو
