ياسمين غيث بعد استئصال ورم حميد: «ادعولي أرجع أعيش من تاني»

كشفت النجمة ياسمين غيث، عن آخر تطورات حالتها الصحية، وذلك بعد خضوعها لعملية جراحية لإزالة ورم حميد، واحتجازها لفترة طويلة بالمستشفى.

أحدث التطورات للحالة الصحية للفنانة ياسمين غيث

ونشرت الفنانة ياسمين غيث، عدة صور لها أثناء خضوعها للعملية الجراحية، وذلك عبر حسابها الرسمي على التواصل الاجتماعي "إنستجرام"، وكتبت: "عارفة إنكم قلقانين عليا ومش عايزة أتأخر عليكم أكتر من كدة رغم تعبي لسه".

وتابعت، قائلة: "مبدئيًا ده شكلي معظم الـ 5 شهور اللي فاتوا.. من شهر 11 حتى الآن، الحمد عملت العملية يوم 6/2 "عملية open chest لإزالة ورم حجمه 8 سم+" الحمد لله ألف حمد وشكر طلع حميد وطلع إنه كتلة من الغدة الدرقية وده هيحتاج إني أعمل فحوصات وcheck up علي الغدة كل 3 شهور، ده طبعا غير الـ general check up اللي بعمله كل 6 شهور.. الحمد لله علي كل حاجة".

وأردفت النجمة ياسمين غيث: "عاملة إيه، تعبانة.. حاسة بإيه، ألم لا يحتمل.. في عضمي، في ضلوعي، في أعصابي.. بس كدة، لأ.. العملية مكانها صعب والفتح في عضم الصدر ألمه مش طبيعي، بس أي إنسان عادي بيحس بالألم ده بطريقة معينة لكن أنا إيه اللي بيحصل معايا، أنا من 7 سنين عملت عملية الـ breast cancer اللي شالوا فيها من صدري اليمين جزء من العضلة، ومعظم الغدد "lymph nodes" اللي تحت الذراع وده أثر من وقتها على ذراعي اليمين وفضل كذا شهر بيوجعني وبعد كدة كمل معايا التنميل والوجع بس محتمل".

وأضافت الفنانة ياسمين غيث، وقالت: "أنا مش بحب أحط صور كدة بس حبيت أعرفكم المرة دي أنا في إيه وبعدي بإيه وشكلي عامل إزاي حاليا والجرح شكله إيه علشان ماتتخضوش لما تشوفوني لأن أنا من كتر وجع الجرح كمان والـ irritation اللي فيه مش بستحمل هدوم عليه فحتى في عز البرد بكون مش حاطة أي هدوم عليه علشان مش بستحمل، فماتخافوش من شكله".

ياسمين غيث تطلب من جمهورها الدعاء لها

واختتمت الفنانة ياسمين غيث رسالتها، قائلة: "ادعوا لي أرجع زي الأول، أنا بقى لي 5 شهور عملت فيهم 4 عمليات بين المستشفيات والعناية المركزة والدكاترة والفحوصات وأوجاع لا تحتمل والله، أدعوا لي علي الأقل أرجع أعيش من غير ألم تاني.. أنا الحمد لله بتحسن بالعلاج الطبيعي بس ببطأ شوية".