رجب بحة يرد على مرتضى منصور بعد اتهامه بعمل سحر للزمالك

رد الحاج رجب محمد محمد شحاتة، وشهرته رجب بحة المقيم بمحافظة الفيوم على تصريحات مرتضى منصور، رئيس الزمالك المعزول، وذلك بعد اتهامه بعمل سحر تسبب في هزيمة الزمالك من الأهلي برباعية مقابل هدف، ضمن مباريات الجولة الـ31 من عمر مسابقة الدوري المصري الممتاز.

"عندي بنات على وش جواز"

وقال رجب بحة في بث مباشر عبر "فيس بوك": "سيادة المستشار متهمني بالباطل إني باعمل سحر لهزيمة الزمالك، عيب كده أنا راجل أمي وأقسم بالله ما أعرف أعمل الحاجات دي، أنا عامل بناء باشتغل بأيدي، وتعالى شوف عيشتي عاملة إزاي".

اقرأ أيضًا: الزمالك يدخل معسكرا مغلقا استعدادا لمواجهة فاركو بالدوري

وأضاف: "أنا راجل أرزقي وإللي بيعمل الحاجة دي بيبقى مشرك بالله، تعالى شوف عيشتي مش هترضاها على نفسك".

واختتم: "عيب تتهمني بالباطل أنا عندي بنات على وش جواز، مينفعش تشوه سمعتي بالباطل، أنا حافظ قرآن رغم إن أمي وبأصلي بالناس".

"الزمالك كان بيلاعب جن أزرق"

من جانبه نشر مرتضى منصور صورة للحاج رجب محمد محمد شحاتة عبر قناة الزمالك، حيث قال: "إللي بيحصل في الزمالك الموسم ده مش طبيعي، حد بعتلي صورة الساحر اسمه رجب بحة، وهو المتسبب في خسارة الزمالك من الأهلي في مباراة القمة، الراجل ده من قرية منية الحيط من الفيوم بلد سيد عبد الحفيظ، ويا ريت حد من الفيوم ينفي الكلام ده".

وأضاف: "الأهلي كان بيلعب في استاد السلام وراح استاد القاهرة ليه؟ علشان يتحكم في السحر، إمبارح الأهلي كان بيشوط الكورة تيجي جول، والزمالك كان بيشوط تيجي في القائم اليمين".

واختتم مرتضى منصور: "الزمالك كان بيلاعب الجن الأزرق، ولكن الجن الأحمر مقدرش، الشناوي مصدش حاجة، كان في بديل له بيصد، وعمرو السيسي اتصاب بعد ما نزل الماتش، برافو يا سيد عبد الحفيظ، الجن اشتغل".