الدكتورة صفاء مختار تكتب: كإننا أبصرنا من سنين
حكاياتنا في الحياة ساعات بتكون متكررة أو شبه بعضها بس بتختلف في الأحداث والتفاصيل حتى والأشخاص ده كمان حسب الوقت والمكان وفصول السنة وتغيرات الجو مطر وبرد وشتاء أوحر ورطوبة والقمر بدر والنجوم في السماء الصافية منورين.
في مواقف بنمر بيها ونحس بإنها حصلت من سنين شفناها وحسناها وعشناها كمان أبصرنا تفاصيلها وزي ما تكون قصة في كتاب بنحكيه لولادنا وإحنا قاعدين.
زي تراود الخواطر بينا وبين ناس جوا القلب عايشين ساكنين حتى لو روحنا بعيدة عنهم سنين.
إحنا بنبقى واخدين بالنا منها ومش فاهمين ولا عارفين ياترى كان ممكن نغير حياتنا!!؟.
كان ممكن أحداث النهاردة تتحرك لأمبارح أو لبكره بس نبقي وقتها فاهمين وعارفين حنغير أيه وليه وحنغير من حياتنا مين!؟
مين نقوله خليك معانا سوا مع بعض مكملين ومين نقرر يبقي كفاية عليه وعلينا إللى غصب عنا تحملناه مرغمين.
أصل الحكاية وحلمها تبقي حقيقة من رتوش تجمل ملامح سنين عمرنا الباقيين.
عشنا بكل الرضا وحنفضل طول حياتنا راضيين. بس القلوب وسكانها لازم يعرفوا إن هيجي عليهم يوم ويكونوا مفارقين.
أصل الحكاية وقتها غير وقتنا دلوقتي مبقاش فاضلنا غير راحة البال والصحة بعيد عن الأنين.
