دينا: أحلى أيام برقص فيها لما ببقى متضايقة
حلت الفنانة دينا ضيفة في برنامج "ع المسرح" تقديم منى عبد الوهاب ويعرض على قناة "الحياة".
قالت دينا عن ابنها، "هو فخور بيا، وهو مبيحبش فن الرقص وبيحب حاجات تانية عشان سنه مزيكا مختلفة وهو معندوش أي مشكلة معايا خالص، ومرة وهو صغير شافني، قالي مامي انتي احلي من هانا مونتانا".
وصرحت "دينا"، عن علاقتها بوالدها الراحل: "ده حبيبي وانا كنت بحبه لحد اخر لحظة ومصدقتش انه مات، أنا أبويا كان صاحبي، ولما مات سري بقي ليا، ومش حقيقي اني رقصت تاني يوم في الفندق اللي توفي فيه هو مات في مستشفى السلام ورقصت تاني يوم عادي، وجوزي لما مات عملت المسرح في نفس اليوم دفنت ورجعت كنت بعرض مسرحية مع أستاذ عادل إمام، وأنا بعرف أفصل يعني ممكن أبقي متضايقة جدًا واعتذر لشغلي بسبب اني متضايقة يبقي مش هشتغل".
واستكملت: "وانا استنيت يوم بعد وفاة والدي عشان انزل اشتغل وبعتبر ان ده شغل وهتدفني وتاخدي العزا وتاني يوم هتنزلي مكتبك وتبقي حزينة برضه، الحزن ميتقطعش في يوم ولا 40 يوم ولا لحد النهاردة كل سنة يوم عيد ميلاده بزعل، وأنا حزينة بطلع شغل مش قادرة أقولك وأحلي أيام برقص فيها لما ببقى متضايقة، الرقص هو حياتي ودايمًا بقعد اتكلم مع نفسي أقول هي الناس اللي مابترقصش بتعمل ايه، ازاي بيخرجوا الطاقة اللي جواهم وهم مابيرقصوش والرقص بالنسبة لي حالة هو عمري كله، وضحيت عشانه كتير وبرنامج جسمي وأكلي وشربي وكل حاجة للرقص، وهو أهم حاجة في حياتي".
