قبل القبض عليه.. عصام صاصا: أنا غلبان وواثق في القضاء المصري
ظهر مطرب المهرجانات عصام صاصا خلال فيديو يتحدث فيه إلى جمهوره قبل ساعات من إلقاء القبض عليه وقال: "أنا دلوقتي نازل بلدي وممكن يكون الفيديو دا آخر فيديو تشوفوه ممكن أتاخد في المطار، أنا عايز أفهم الناس إيه اللي حصل معايا بالظبط وإيه اللي أنا فيه لأن الناس مش فاهمة حاجة وبتدخل تقول كلام محصلش".
وتابع عصام صاصا ليحكي عن يوم الحادث: "أنا كنت راجع من شغلي ومصحف ربنا وربنا شاهد على كلامي رايح أجيب ابني عشان هعمل عقيقة أفرح بيه، وأنا راجع في نص الدائري في بنزينة هناك وفي طلعة أكتوبر وأنا ماسك نص الدائري عشان دا طريقي، الله يرحمه ويحسن إليه وينور له قبره ويبارك في عياله أنا مخبطوش من الرصيف زي ما الناس بتقول مش همشي أخبط في الرصيف الخبطة على الشمال مش اليمين، وفي راجل ربنا بعته ليا لا يعرفني ولا أعرفه طلع حكى نفس الكلام اللي أنا بقوله ربنا يعلم أنا كنت حاسس بإيه ساعتها وعملت إيه لأجل الناس دي".
وأكمل عصام صاصا: "الناس قالت عليا إني بدوس على الناس بفلوسي أو إني بمشي أخبط الناس، أنا واحد والده متوفي من وهو عنده سنة عشت عمري كله مع أمي بس أنا وأخويا وشفنا كل المراحل اللي تتخيلوها تحت خط الفقر، ربنا كرمني من سنتين تلاتة فأكيد ربنا مكرمنيش بالفلوس اللي هدوس بيها على الناس أو أكون زي ما بتقولوا كلامكم دا".
وأضاف عصام صاصا: "أنا مكنتش حابب أرد وسايب كله يتكلم لكن دلوقتي ممكن أتزل ومتشوفونيش تاني وبسبب الكلام دا بقى عليا قضايا تانية مع أن أنا غلبان، أنا محتاج دعمكم ومحتاج كل اللي بيحبني وزي ما أنا فرحتهم أنهم يدعولي محتاج كل دعوة من أي حد وأنكم تفهموا إني عمري ما أكون البني آدم اللي يدوس على الناس بفلوسه لأني شفت حاجات تخليني مبقاش كده ولا عندي الفلوس اللي تخليني أدوس على الناس، أنا راضي بقضاء ربنا وواثق في القضاء المصري وأيا كان الحكم إيه وأن القضاء المصري عمره ما يظلم حد".
